नागपूर Nagpur Kattalkhana: उमरेड तालुक्यातील सुरगाव येथे तयार होत असलेल्या कत्तलखान्याला (Kattalkhana) विरोध करण्यासाठी, आज वारकरी संप्रदायाच्या लोकांनी मुख्यमंत्री एकनाथ शिंदेंची (CM Eknath Shinde) भेट घेतली. नागपूर येथील शासकीय निवासस्थानी ही भेट घेण्यात आली. माजी आमदार राजू पारवे (Raju Parve) यांच्या नेतृत्वाखाली वारकरी संप्रदायाचे प्रतिनिधी मुख्यमंत्री शिंदे यांना भेटण्यासाठी आले होते.
अधिकाऱ्यांना दिल्या सूचना: पवनगाव येथे होणारा कत्तलखाना हा कोर्टाच्या आदेशानंतर उमरेड रोडवरील सुरगाव येथे होत आहे. नागपूर जिल्ह्यात कुठेही हा कत्तलखाना होऊचं देणार नाही अशी भूमिका, वारकऱ्यांनी घेतली आहे. या विषयाच्या अनुषंगानं वारकरी संप्रदायाच्या प्रतिनिधींनी मुख्यमंत्री एकनाथ शिंदे यांच्यासोबत भेट घेतली. वारकऱ्यांचं पूर्ण म्हणणे ऐकल्यानंतर मुख्यमंत्री एकनाथ शिंदे यांनी लगेच जिल्हाधिकारी आणि एनएमआरडीच्या अधिकाऱ्यांना आवश्यक त्या सूचना दिल्या आहेत. उच्च न्यायालयानं दिलेल्या आदेशाला सर्वोच्च न्यायालयात अवाहन दिलं जाणार आहे.
उमरेड तालुक्यातील सुरगाव येथे होणाऱ्या कत्तलखाण्याच्या आदेशाला स्थगिती मिळावी अशी मागणी, वारकरी संप्रदायाकडून करण्यात आली आहे. न्यायालयीन लढाई लढण्यासाठी वकील नेमण्याची वेळ आमच्यावर आलेली असून हे फार दुर्दैवी आहे. हा कत्तलखाना येथे झाला तर निष्पाप प्राण्यांचा बळी देण्यासाठी सर्वात पहिला बळी माझा असेल. -ओमदेव महाराज चौधरी, वारकरी