भाजपाचा विदर्भावर 'फोकस'; लोकसभा निवडणुकीतील अपयशामुळं पीएम मोदी, शाहांचे दौरे वाढले - Assembly Elections 2024

Assembly Elections 2024 : लोकसभा निवडणुकीत भाजपा हा विदर्भात बॅकफूटवर राहिला. आता येत्या काही दिवसात राज्यात निवडणुका होणार आहेत. त्यामुळं सर्वच पक्षांनी कंबर कसली. भाजपाचे दिल्लीतील नेते येणाऱ्या काळात राज्यात तळ ठोकून बसणार आहेत. तसंच पंतप्रधान नरेंद्र मोदी आणि केंद्रीय गृहमंत्री अमित शाह यांचेही खास विदर्भात दौरे वाढले आहेत. वाचा सविस्तर बातमी...

नागपूर Assembly Elections 2024 : विधानसभा निवडणूक लवकरच जाहीर होण्याची शक्यता असल्यानं पंतप्रधान नरेंद्र मोदी आणि गृहमंत्री अमित शाह यांचे राज्यातील दौरे वाढले आहेत. लोकसभा निवडणुकीत राज्यात भाजपाला फटका बसल्याच्या पार्श्वभूमीवर विधानसभा निवडणुकीच्या तयारीचा आढावा घेण्यासाठी अमित शाह हे मंगळवारपासून दोन दिवसांच्या राज्याच्या दौऱ्यावर आहेत. त्यांच्या या दौऱ्यात महायुतीतील जागावाटपावरही यावेळी चर्चा होण्याची शक्यता आहे.

महायुतीतील जागावाटपाबाबत होणार चर्चा : लोकसभा निवडणुकीत विदर्भात भाजपाला मोठं नुकसान सहन करावं लागलं होतं. आता आगामी विधानसभा निवडणुकीतही तीच परिस्थिती कायम राहील, अशी भीती भाजपाच्या नेत्यांना वाटू लागल्यानं भाजपाने विदर्भाकडं लक्ष केंद्रित केलंय. काही दिवसांपूर्वी पंतप्रधान नरेंद्र मोदी यांनी वर्धेचा दौरा केला होता. त्यानंतर आता लगेच गृहमंत्री अमित शाह विदर्भातील भाजपाच्या कार्यकर्त्यांचा आत्मविश्वास वाढवण्यासाठी दौऱ्यावर आहेत.

मोदींचा लवकरच वाशिम दौरा :अमित शाह हे महाराष्ट्र दौऱ्यात महायुतीतील जागावाटपाच्या संदर्भात पक्षाच्या नेत्यांशी चर्चा करणार आहेत. यावेळी मुख्यमंत्री एकनाथ शिंदे व उपमुख्यमंत्री अजित पवार अमित शाह यांची भेट घेण्याची शक्यता आहे. पंतप्रधान नरेंद्र मोदी लवकरच वाशिम जिल्हा दौरा करणार आहेत. "लोकसभा निवडणुकीत भाजपाला अपयश आलं, पण त्याच्यातुन मार्ग काढण्यासाठी अमित शाह दौऱ्यावर आलेत," असं भाजपा नेते आशिष देशमुख यांनी सांगितलं.

अमित शाहांनी घेतला आढावा : अमित शाह यांच्या उपस्थितीत नागपुरात भाजपाच्या कार्यकर्त्यांची बैठक घेण्यात आली. ज्यामध्ये भाजपाच्या विदर्भातील पदाधिकाऱ्यांनी लोकसभा निवडणुकीनंतर केलेल्या सर्व विकास कामांचा आढावा घेण्यात आला. तसंच भाजपाच्या प्रत्येक जिल्ह्यातील जिल्हाध्यक्ष व प्रमुख पदाधिकारी यांच्याकडून त्यांच्या जिल्ह्यात व मतदारसंघात संघटनात्मक पातळीवर केलेल्या कामांची माहिती जाणून घेण्यात आली. प्रतिकूल असलेल्या बूथवर केलेली कामं, नवीन मतदारांची नोंदणी, मतदारांशी संपर्क याबाबत प्रमुख पदाधिकाऱ्यांकडून संपूर्ण माहिती अमित शाह यांनी घेतली.

हेही वाचा