देवेंद्र फडणवीस यांच्यापाठोपाठ शंभूराज देसाई म्हणाले; "मला मंत्रिपदापासून मुक्त करा", कारण काय? - Shambhuraj Desai News

Lok Sabha Election Result लोकसभेचा निकाल जाहीर झाल्यानंतर घटलेल्या मताधिक्याची जबाबदारी अनेक नेते घेताना दिसत आहेत. अशातच साताऱ्याचे पालकमंत्री शंभूराज देसाई यांनी खळबळजनक विधान केल्यामुळे राजकीय वर्तुळात चर्चा रंगली आहे.

सातारा Lok Sabha Election Result:लोकसभा निवडणुकीत महाराष्ट्रात महायुतीला मोठा फटका बसला. भाजपा नेत्यांचा अनेक जागांवर दारुण पराभव झाला. यामुळे राज्याचे उपमुख्यमंत्री देवेंद्र फडणवीस यांनी पत्रकार परिषद घेऊन पराभवाची जबाबदारी स्वीकारली. त्यांनी मंत्रिमंडळातून बाहेर पडण्याची इच्छा व्यक्त केली. अशात सातारा महायुतीच्या उत्पादन शुल्क मंत्री तथा साताऱ्याचे पालकमंत्री शंभूराज देसाईंनी मंत्रिपदाच्या जबाबदारीतून मुक्त करण्याची मागणी मुख्यमंत्र्यांकडे करणार असल्याचं वक्तव्य केलं आहे.

"महायुतीचे उमेदवार उदयनराजे भोसले नसून शंभूराज देसाई उभे आहेत. त्यामुळे कार्यकर्त्यांनी त्यांना मताधिक्याने विजयी करावे, असा प्रचार करुनसुध्दा उदयनराजेंना मताधिक्य मिळाले नाही. यावर मी कुणालाही दोष देणार नाही. इथला आमदार म्हणून मी एकटा त्याला जबाबदार आहे, असे साताऱ्याचे पालकमंत्री शंभूराज देसाईंनी म्हटलं. त्यामुळे राजकीय वर्तुळात उलटसुलट चर्चांना उधाण आलं आहे.

उदयनराजेंचं घटलेलं मताधिक्य हा माझाच पराभव: पाटण विधानसभा मतदारसंघातील शिवसेना (शिंदे गट) कार्यकर्त्यांच्या मेळाव्यात बोलताना शंभूराज देसाई म्हणाले की, "लोकसभा निवडणुकीत उदयनराजे भोसले विजयी झाले. असे असले तरी घटलेल्या मताधिक्यामुळे माझाच पराभव झाला आहे. मंत्रिपदामुळे शिवसेनेच्या कार्यकर्त्यांच्या डोक्यात सत्ता गेली. त्यांना सुस्ती आली‌‌. त्यामुळे घटलेले मताधिक्य ही माझी जबाबदारी आहे. मुख्यमंत्री एकनाथ शिंदे यांचा मी अपेक्षाभंग केला आहे."

कार्यकर्त्यांना सत्ता टिकवता आली नाही:पुढे शंभूराज म्हणाले, " उदयनराजे भोसले यांचं पाटण तालुक्यातून मताधिक्य घटल्याचं मलाही शल्य आहे. उदयनराजे या निवडणुकीत विजयी झाले असले तरी शंभूराज देसाईंचा पराभव झाला आहे. मी खुर्चीला चिटकून बसणारा कार्यकर्ता नाही. तालुक्यातील जनतेच्या व कार्यकर्त्यांच्या हितासाठी सत्ता मिळवली. ती सत्ता कार्यकर्त्याना टिकवता आली नाही. यापुढील काळात मी संघटनेसाठी काम करणार आहे, " असे त्यांनी कार्यकर्त्यांना सुनावलं.

मुख्यमंत्र्यांचा विश्वास सार्थ करू शकलो नाही: " लवकरच मुख्यमंत्री एकनाथ शिंदे यांची भेट घेवून मंत्रीपदाच्या जबाबदारीतून मुक्त करावे, अशी विनंती करणआर आहे. मी आमदार म्हणून संघटनेसाठी काम करणार असल्याचे मुख्यमंत्र्यांना सांगणार आहे. मुख्यमंत्र्यांचा माझ्यावर विश्वास होता. मात्र तो सार्थ करू शकलो नाही," अशी खंत शंभूराज देसाईंनी कार्यकर्ता मेळाव्यात बोलून दाखवली.

हेही वाचा