मुंबई -उपमुख्यमंत्री देवेंद्र फडणवीस यांनी शिवाजी महाराजांचा अपमान केल्याची टीका उद्धव ठाकरे गटाचे नेते, खासदार संजय राऊत यांनी केलीय. उद्धव ठाकरे यांनी राज्यातील प्रत्येक जिल्ह्यामध्ये शिवाजी महाराजांचे मंदिर उभारणार असल्याचं म्हटलं होतं. परंतु देवेंद्र फडणवीस हा नतद्रष्ट माणूस असल्याची टीका संजय राऊत यांनी केलीय. ते मुंबईत बोलत होते.
तुम्हाला लाज का वाटत आहे?:याप्रसंगी बोलताना संजय राऊत म्हणाले की, देवेंद्र फडणवीस हा माणूस मराठी माणसाचा, पूर्ण महाराष्ट्राचा आणि छत्रपती शिवाजी महाराजांचा द्वेष करणारा असल्याचं काल पुन्हा एकदा सिद्ध झालंय. आम्ही शिवाजी महाराजांचे मंदिर प्रत्येक जिल्ह्यात उभारत आहोत, याची तुम्हाला लाज वाटत आहे का? अशा माणसाचा महाराष्ट्रात जन्म झाला, यावरदेखील संजय राऊत यांनी टीका केलीय. तुम्ही जिथे सांगाल तिथे आम्ही शिवाजी महाराजांचे मंदिर उभारू, परंतु त्या मंदिरात येण्याची तुमची हिंमत आहे का? असा प्रश्नही संजय राऊत यांनी उपस्थित केलाय.