राज्याच्या इतिहासात पहिल्यांदाच विरोधी पक्षनेत्याविना चालणार सभागृह? जाणून घ्या कारण...

महाराष्ट्र विधानसभा निवडणुकीत महायुतीनं तब्बल 230 जागांवर विजय मिळवलाय. त्यामुळं मविआला आता विरोधी पक्षनेतेपद मिळणार नाही. राज्यात प्रथमच विधानसभेत विरोधी पक्षनेतेपद कोणत्याही पक्षा मिळणार नाही.

मुंबई : महाराष्ट्र विधानसभा निवडणुकीचं (Maharashtra Assembly Election Results 2024) चित्र पूर्णपणे स्पष्ट झालंय. या निवडणुकीत भाजपा, शिवसेना आणि राष्ट्रवादी काँग्रेस अशी जुळवाजुळव झाली. भाजपाच्या नेतृत्वाखालील महायुतीसमोर महाविकास आघाडीचा दारुण पराभव झालाय. विधानसभा निवडणुकीच्या निकालापूर्वी महाविकास आघाडीच्या तिन्ही पक्षांनी मुख्यमंत्रिपदाचं स्वप्न उराशी बाळगलं होतं. पण निकालानंतर महाविकास आघाडीला विधानसभेतील विरोधी पक्षनेतेपद देखील नशिबी आलेलं नाही. विशेष म्हणजे राज्याच्या इतिहासात अशी स्थिती पहिल्यांदाच निर्माण झाल्याचं बोललं जातंय.

दहा टक्के जागांची मर्यादा :महाविकास आघाडीतील घटक पक्ष काँग्रेस, शिवसेना (उबाठा) आणि राष्ट्रवादी कॉंग्रेस (शरदचंद्र पवार) यापैकी कोणत्याही पक्षाला 20 पेक्षा जास्त जागा निवडून आणता आलेल्या नाहीत. विरोधी पक्षनेतेपदासाठी लोकसभा तसंच विधानसभेत एकूण सदस्य संख्येच्या प्रमाणात ठराविक संख्याबळाची आवश्यकता असते. त्यामुळं लोकसभा आणि विधानसभा नियमावलीनुसार एखाद्या पक्षाला विरोधी पक्षनेतेपद तेव्हाच मिळतं, जेव्हा राज्यातील विधानसभेच्या एकूण जागांपैकी 10 टक्के जागा असतात. सध्या महाविकास आघाडीतील घटक पक्षांपैकी कोणत्याही पक्षाला किमान दहा टक्के जागांची मर्यादादेखील ओलांडता आली नाही. महाविकास आघाडीसाठी विरोधी पक्षनेते पदाचा मार्ग देखील बंद झालाय.

महाविकास आघाडीला केवळ 46 जागा-महाराष्ट्र विधानसभेत एकूण 288 जागा आहेत. त्यामुळं कोणत्याही पक्षाकडं विरोधी पक्षनेतेपदासाठी किमान 29 आमदार असले पाहिजेत. पण, महाविकास आघाडीत कोणत्याही पक्षाचे 29 आमदार विजयी झालेले नाहीत. काँग्रेसपासून शिवसेना (उबाठा) आणि राष्ट्रवादी कॉंग्रेस (शरदचंद्र पवार) पर्यंत कोणत्याही पक्षाला 20 पेक्षा जास्त जागा जिंकता आल्या नाहीत. महाविकास आघाडीच्या तिन्ही प्रमुख पक्षांच्या आणि अन्य लहान घटक पक्षांच्या मिळून 46 जागा मिळाल्या. पण एकाही पक्षाला 29 जागा मिळाल्या नाहीत. त्यामुळं महाराष्ट्रात महाविकास आघाडीला विरोधी पक्षनेता पददेखील नशिबी नसल्याचं चित्र आहे.

कोणाला किती जागा? : विधानसभेच्या 288 जागांपैकी महायुतीला 230 जागा मिळाल्या आहेत. यात भाजपाला 132 जागा, शिवसेनेला 57 आणि राष्ट्रवादी काँग्रेसला 41 जागा मिळाल्या आहेत. महाविकास आघाडीला एकूण 46 जागा मिळाल्या आहेत. काँग्रेसला 16, शिवसेनेला (उबाठा) 20 आणि राष्ट्रवादी काँग्रेसला (शरदचंद्र पवार) 10 जागा जिंकता आल्या आहेत. तर अपक्ष-इतर यांना 12 जागा मिळाल्या आहेत.

हेही वाचा -