महायुती पुन्हा सत्तेत आल्यास वर्षभरात मुंबई-गोवा महामार्ग तयार होणार; गोव्याचे मुख्यमंत्री प्रमोद सावंतांचं विधान

राज्यात पुन्हा महायुती सत्तेत आल्यावर एक वर्षात मुंबई- गोवा महामार्ग तयार होईल, असंही गोवा राज्याचे मुख्यमंत्री प्रमोद सावंत यांनी म्हटलंय.

पुणे -गेल्या अनेक वर्षांपासून मुंबई-गोवा महामार्गाच्या चौपदरीकरणाचं काम रखडलंय. मुंबई ते गोवादरम्यानचा महामार्ग हा काही कंत्राटदार चांगले न मिळाल्यानं रखडलाय. तसेच महाराष्ट्रात मध्यंतरीच्या काळात युतीचं सरकार बदलून महाविकास आघाडीचं सरकार आलं होतं, त्यामुळे मुंबई-गोवा महामार्गाच्या चौपदरीकरणातही बऱ्याच अडचणी निर्माण झाल्या होत्या. केंद्रीय वाहतूक मंत्री नितीन गडकरी यांनीदेखील आता याबाबत पुढाकार घेतला असून, राज्यात पुन्हा महायुती सत्तेत आल्यावर एक वर्षात मुंबई-गोवा महामार्ग पूर्ण होईल, असे मत गोवा राज्याचे मुख्यमंत्री प्रमोद सावंत यांनी व्यक्त केलंय. पुण्यात आज गोव्याचे मुख्यमंत्री प्रमोद सावंत यांची पत्रकार परिषद आयोजित करण्यात आली होती. त्यावेळी ते बोलत होते. यावेळी भाजपा प्रदेश महामंत्री राजेश पांडे, प्रवक्ते संदीप खर्डेकर आदी उपस्थित होते.

केंद्राने मराठी भाषेला अभिजात दर्जा दिलाय : पुढे प्रमोद सावंत म्हणाले की, महाराष्ट्रात पुन्हा महायुती सरकार सत्तेत आले पाहिजे. गोव्यामध्ये रस्ते, रेल्वे आणि विमानतळ याचा मागील दहा वर्षांत कायापालट झालाय. महाराष्ट्र विकसित करण्यासाठी महायुती सरकार राज्यात पुन्हा आलं पाहिजे. वर्ष 2014 मध्ये राज्यातील जनतेने भाजपाला बहुमत दिले. 2019 मध्येदेखील जनतेने युतीला साथ दिली. पण उद्धव ठाकरे यांच्या स्वार्थामुळे वेगळी राजकीय परिस्थिती निर्माण झालीय. एकनाथ शिंदे आणि अजित पवार यांच्यासोबत भाजपा राज्यात चांगल्या प्रकारे काम करीत आहे. मराठी भाषेमध्ये माझं शिक्षण झालं असून, मराठी भाषेला अभिजात भाषेचा दर्जा काँग्रेसकडून कधी दिला गेला नसता, पण भाजपाच्या केंद्र सरकारने मराठी भाषेला अभिजात दर्जा दिलाय ही महाराष्ट्रासाठी गौरवाची बाब आहे, असं यावेळी प्रमोद सावंत म्हणालेत.

काँग्रेसने देशातील गरिबी कधीच दूर केली नाही : दरम्यान, युवा शक्ती, महिला शक्ती, किसान शक्ती आणि गरीब कल्याण या चार मुद्द्यांवर सरकारच्या सर्व योजना राबवल्या जाताहेत. गृह आधार योजनेंतर्गत आम्ही 11 वर्ष महिलांना दर महिना 1500 रुपये मदत दिलीय. पण कर्नाटकने अशी घोषणा निवडणुकीच्या वेळी केली, पण काँग्रेसने त्याची अंमलबजावणी केली नाही, असंही प्रमोद सावंत म्हणालेत. शेतकरी आत्महत्या होत असताना त्यांना आधार देण्यासाठी शेतकरी सन्मान योजना, कृषी पंप वीज बिलमाफी, पीक विमा दिला गेलाय. काँग्रेसने देशात गरिबी हटाव योजना आणली, पण गरिबी ते कधीच दूर करू शकले नाहीत. काँग्रेसने महाराष्ट्रात 60 वर्ष राज्य केले, त्यांनी त्यांच्या किती पायाभूत सुविधा निर्माण झाल्या त्या सांगाव्यात, पण मागील दहा वर्षांत मोदी सरकारने महाराष्ट्रात अनेक विकासकामे राबवलीत. विकसित महाराष्ट्र आणि विकसित भारतासाठी जनतेने महायुतीला साथ द्यावी. काँग्रेस नेते राहुल गांधी कोणतेही पुरावे नसताना बिनबुडाचे आरोप सातत्याने आदिवासी समाजावर करीत असतात. आदिवासी यांचा सन्मान करण्याचे काम भाजपाने प्रथम केले. काँग्रेसला 60 वर्षांत बिरसा मुंडा कधी आठवले नाही, पण भाजपाने त्यांची राष्ट्रीय स्तरावर जयंती सुरू केल्याचं यावेळी त्यांनी सांगितलंय.

हेही वाचा :