शहरात बिबट्याचा ठावठिकाना लागेना, जुन्या व्हिडिओमुळं संभाजीनगरमध्ये संभ्रम - No Sign of Leopard

Sambhajinagar Leopard : उल्कानगरी येथील खिंवसरा पार्कमध्ये सोमवारी पहाटे एक बिबट्या सीसीटीव्हीत कैद झाला होता. त्यानंतर छत्रपती संभाजीनगर महानगरपालिका (CSMC) तसंच वनविभागाच्या अधिकाऱ्यांनी विविध निवासी भागात बिबट्यासाठी शोध मोहीम सुरू केलीय. परंतु बिबट्याचा काही ठावठिकाना अजूनही लागत नाही.

छत्रपती संभाजीनगर Sambhajinagar Leopard :गेल्या चार दिवसांपासून छत्रपती संभाजीनगरमध्ये बिबट्याची दहशत निर्माण झाली आहे. वेगवेगळ्या ठिकाणी सीसीटीव्ही कॅमेऱ्यात कैद होत असलेला बिबट्या प्रत्यक्ष नजरेस पडत नसल्यानं, तो नेमका गेला कुठं?, असा प्रश्न उपस्थित होत आहे. तर, दुसरीकडं समाज माध्यमांवर विविध भागांमधील जुने व्हिडिओ व्हायरल होत, असल्यानं अफवा पसरली आहे. लोक बाहेर पडताना विचार करत असून काही ठिकाणी पालकांच्या मागणीमुळं शाळांना सुट्टी द्यावी लागली आहे. वन विभागानं काही ठिकाणी पिंजरे लाऊन त्याला पकडण्यासाठी सापळा लावला आहे. मात्र, गेल्या चार दिवसांपासून बिबट्याला पकडण्यात यश आलं नाही.

चार दिवसांपूर्वी दिसली बिबट्याची झलक :छत्रपती संभाजीनगर शहरात गेल्या चार दिवसापासून बिबट्यानं दहशत निर्माण केली आहे. मात्र, बिबट्या नेमका आहे कुठे? याबाबत संभ्रम निर्माण झाले आहेत. चार दिवसांपूर्वी उल्कानगरी भागात वीज खंडित झाली होती, त्यावेळी महावितरणचे लाईनमन तांत्रिक बिघाड पाहण्यासाठी बाहेर पडले असताना, त्यांना मध्यरात्री बिबट्याची पहिली झलक पाहायला मिळाली. त्यावर परिसरातील नागरिकांना त्यांनी सतर्क केलं. सकाळी परिसरातील सीसीटीव्ही कॅमेरे तपासणी केली असता, दोन कॅमेऱ्यांमध्ये बिबट्या कैद झाला. त्यामुळं नागरिकांनी तातडीनं वन विभागाला याची माहिती दिली. बिबट्याला पकडण्यासाठी उपाययोजनांना सुरुवात करण्यात आली. जवळ असलेल्या नाल्यातून हा बिबट्या लोकवस्तीत आला असावा असा अंदाज आहे. मात्र, पुढं दोन दिवस या बिबट्याचा काहीच ठाव ठिकाणा लागला नाही.

मॉल जवळ झालं पुन्हा दर्शन :उल्कानगरी परिसरात बिबट्याचा तपास सुरू असताना गुरुवारी मध्यरात्री त्याची हालचाल शहरात असलेल्या प्रोझोन मॉल मध्ये दिसून आली. दोन ठिकाणी वेगवेगळ्या कॅमेऱ्यात तो दिसून आला. पहिल्या ठिकाणापासून तब्बल तीन किलोमीटर पुढं असलेल्या ठिकाणी त्याची हालचाल कैद झाली. त्यामुळं सिडको आणि इतर परिसरात सतर्कतेचा इशारा देण्यात आला. त्याचबरोबर प्रोझोन मॉल परिसर वन विभागानं पिंजून काढला, मात्र बिबट्या कुठंही आढळून आला नाही. त्या ठिकाणी पिंजरा लावून बिबट्याची शोधाशोधा सुरू झाली. इथंही बिबट्या नेमका गेला कुठं याचं उत्तर मिळेनासं झालं. वेगवेगळ्या उपाययोजना करून बिबट्याला पकडण्यासाठी वन विभागानं विशेष मोहीम हाती घेतली आहे.

अफवांमुळं नागरिकांमध्ये संभ्रम :एखादी घटना घडल्यानंतर समाज माध्यमांवर येणाऱ्या प्रतिक्रिया कधी त्रासदायक होतात, असाच काहीसा प्रकार संभाजीनगरमध्ये पाहायला मिळतोय. चार दिवसांपूर्वी बिबट्या दिसल्यानंतर समाज माध्यमांवर वेगवेगळ्या पद्धतीनं त्याविषयीची माहिती नागरिकांपर्यंत पोहचू लागलीय. त्यामध्ये वेगवेगळे जुने व्हिडिओ टाकून वेगवेगळ्या भागांचा संदर्भ देत शहरात बिबट्याचा वावर वाढल्याचं सांगण्यात आलं. तर कधी एक नाही तर तब्बल तीन बिबटे शहरात वावरत असल्याची अफवा देखील पसरवण्यात आली. त्यामुळं नागरिक आधीच भयभीत झाले आहेत. मात्र, या अफवांवर विश्वास ठेवू नका, हा एकच बिबट्या सर्वत्र वावरत आहे, अशी माहिती वन विभागानं दिली आहे.