मुंबई Indias First Airbus A350 : देशातील अग्रगण्य विमान कंपनी असलेल्या एअर इंडियाने पहिली 'एअरबस ए-३५०' विमान सेवा सुरू केलीय. फ्लाइट Al 589 ने सोमवारी मुंबईच्या छत्रपती शिवाजी महाराज आंतरराष्ट्रीय विमानतळावरून चेन्नईसाठी उड्डाण केलं आहे. या उड्डाणाने भारतीय विमान वाहतुकीच्या एका नव्या अध्यायाची सुरुवात झालीय. हे विमान जगातील अत्यंत प्रगत आणि आरामदायी मानले जात आहे.
प्रवास होणार आरामदायक : एअरबस ए-३५० विमानसेवा सध्या आंतरदेशीय मार्गावर चालणार आहे. बेंगळुरू, चेन्नई, दिल्ली, हैदराबाद आणि मुंबईतील प्रवाशांना या विमानाच्या माध्यमातून अधिक आरामदायक प्रवास आणि अत्याधुनिक तंत्रज्ञान अनुभवता येणार आहे. वर्षभरापूर्वी एयर इंडियाने A350-470 नवीन विमानांची ऑर्डर दिली होती. आंतरदरेशीय मार्गावरील सेवेनंतर सदर एयरबस आंतरराष्ट्रीय मार्गावर तैनात करण्यात येणार आहे. या विमानाच्या समावेशानंतर एयर इंडियाचा ताफा अधिकच बळकट होणार आहे.
अशी आहे रचना :या विमानात तीन श्रेणीत एकूण ३१६ आसने असणार आहेत. यामध्ये फ्लॅट बेडसह २८ बिझनेस सूट, २४ प्रिमियम इकॉनॉमी सूट तर २६२ इकॉनॉमी श्रेणीतील आसनांचा समावेश आहे. ही सर्व आसने अत्यंत आरामदायी, मनोरंजनासाठी अत्याधुनित एचडी स्क्रिन उपलब्ध असणारी आहेत. जेणेकरुन प्रवाशांना प्रवासाचा थकवा येणार नाही. या विमानाच्या इंजिनाबाबत अधिक माहिती अशी की, एयरबस विमानाचे इंजन इतर विमानांपेक्षा 20 टक्के अधिक कार्यक्षम आहे.