नागपूरमध्ये हिट अँड रन फुटपाथवर झोपलेल्या आठ जणांना मद्यधुंद कारचालकानं चिरडलं, दोघं ठार - Nagpur Hit and Run

Hit and Run in Nagpur : नागपुरात एका कारनं वृद्ध व्यक्तीला चिरडल्याची घटना ताजी असतानाच रविवारी रात्री एका मद्यधुंद कार चालकानं फुटपाथवर झोपलेल्या 8 जणांना चिरडल्याची धक्कादायक घटना घडली आहे. या घटनेमुळं सर्वत्र एकच खळबळ उडाल्याचं बघायला मिळतंय.

नागपूर Hit and Run in Nagpur : गेल्या काही दिवसांपासून नागपूर शहरात 'हिट अँड रन'च्या घटनांमध्ये मोठी वाढ झाल्याचं बघायला मिळतंय. असं असतानाच आता रविवारी रात्री एका मद्यधुंद कारचालकानं फुटपाथवर झोपलेल्या आठ जणांना चिरडल्याची धक्कादायक घटना घडली आहे. या घटनेत दोघांचा मृत्यू झालाय. रात्री उशिरा वाठोडा पोलीस ठाण्याच्या हद्दीत असलेल्या दिघोरी चौकाजवळ ही घटना घडली आहे. कारचालकाला अटक करण्यात आलीय.

नेमकं काय घडलं? :दिवसभर शहरातील विविध भागात फुटपाथवर खेळणी विक्रीचा व्यवसाय केल्यानंतर रोजच्या दिनक्रमानुसार काही लोक फुटपाथवर झोपले होते. उमरेडच्या दिशेनं जाणाऱ्या भरधाव कारचालकाचं कार वरील नियंत्रण सुटलं. त्यानंतर कार थेट फुटपाथवर चढली. यावेळी फुटपाथवर झोपलेले 8 जण कार खाली चिरडले गेले. या घटनेत दोघांचा मृत्यू झाला. तर अनेक जण गंभीर जखमी झाले आहेत. तसंच यामध्ये महिला आणि लहान मुलांचाही समावेश असल्याचं सांगण्यात आलंय.

कारचालकाला अटक : या प्रकरणात पोलिसांनी भूषण लांजेवार (वय 20) सह अन्य पाच आरोपींना ताब्यात घेतलंय. पोलिसांनी दिलेल्या माहितीनुसार, भूषण लांजेवार आणि त्याचे काही मित्र पार्टी करून परतत असताना त्यांचं वेर्ना (Verna) कारवरील नियंत्रण सुटलं. त्यामुळं हा अपघात घडला. अपघातानंतर आरोपी पळून गेले होते. मात्र, पोलिसांनी दीड दोन तासांच्या प्रयत्नानंतर सर्व आरोपींना अटक केली आहे.

हेही वाचा -