अमरावती विद्यापीठात आता 'हिरकणी कक्ष'; स्तनपान करण्यासाठी स्वतंत्र खोली

Hirkani Kaksha In Amravati University : गर्भवती महिला आणि स्तनदा मातांसाठी सरकारी कार्यालयं, बस स्थानकं आणि रेल्वे स्थानकांवर हिरकणी कक्ष असतो. महिलांना विश्रांतीसाठी, बाळाला दूध पाजण्यासाठी या कक्षाचा वापर केला जातो. दरम्यान, विद्यापीठात शिक्षणासाठी येणाऱ्या मातांना स्तनपान करता यावं यासाठी आता अमरावतीतील संत गाडगेबाबा विद्यापीठात 'हिरकणी कक्ष' सुरू करण्यात आला आहे.

अमरावती Hirkani Kaksha In Amravati University : संत गाडगेबाबा अमरावती विद्यापीठात अमरावतीसह अकोला, यवतमाळ, बुलडाणा आणि वाशिम अशा पाच जिल्ह्यातील विद्यार्थी शिक्षणासाठी येतात. तर अनेक विद्यार्थिनी लग्नानंतरदेखील आपलं शिक्षण पूर्ण करण्यासाठी इथं येत असतात. बाळ झाल्यानंतर देखील शिक्षण सुरू ठेवणाऱ्या या विद्यार्थिनींसाठी संत गाडगेबाबा अमरावती विद्यापीठाच्या व्यवस्थापन परिषदेनं विद्यापीठ परिसरात 'हिरकणी कक्ष' उभारण्याचा निर्णय घेतला. नंतर या निर्णयाला सिनेटने मंजुरी दिली. त्यानंतर विद्यापीठातील परीक्षा विभागासमोर हा 'हिरकणी कक्ष' सुरू करण्यात आला. दरम्यान, महिनाभरापूर्वी या हिरकणी कक्षाची सुरुवात करण्यात आल्याची माहिती विद्यापीठाच्या प्रभारी परीक्षा नियंत्रक मोनाली तोटे यांनी 'ईटीव्ही भारत' शी बोलताना दिली.

असे आहे हिरकणी कक्ष : संत गाडगेबाबा अमरावती विद्यापीठाच्या परीक्षा विभागासमोर महिला सुविधा केंद्राच्या सुसज्ज इमारतीमध्ये 'हिरकणी कक्ष' सुरू करण्यात आलाय. या कक्षामध्ये विद्यार्थिनी मातांना आपल्या बाळांना घेऊन सहज बसता येईल अशी सुविधा करण्यात आली आहे. तसंच या ठिकाणी कुलर, फ्रीज, पिण्याचे पाणी, स्वतंत्र शौचालय यांची सुविधा देखील करण्यात आली आहे. या ठिकाणी केवळ विद्यार्थिनी माता आणि त्यांच्यासोबत असणाऱ्या महिलेलांच प्रवेश दिला जाईल. तसंच या कक्षात येणाऱ्या माता महिलांची नोंद देखील ठेवली जाणार आहे.

लवकरच आणखी विकासात्मक बदल होतील : महिनाभरापूर्वीच विद्यापीठाच्या परिसरात हा हिरकणी कक्ष सुरू झाला असून या ठिकाणी हळूहळू आणखी विकासात्मक बदल होतील अशी माहिती देखील विद्यापीठाच्या प्रभारी परीक्षा नियंत्रक मोनाली तोटे यांनी दिली. तसंच विद्यापीठात कुठल्याही कामानिमित्त बाळाला घेऊन येणाऱ्या मातांनी या हिरकणी कक्षाचा लाभ घ्यावा, असं आव्हान देखील मोनाली तोटे यांनी केलं आहे.

हेही वाचा -