अहमदनगर Ahmednagar News :नगर जिल्ह्यातील नेवासे तालुक्यातील वाकडी गावातील धक्कादायक घटना समोर आलीय. मांजरला काढण्यासाठी शेणानं भरलेल्या विहिरीत सहा जण उतरले होते. यातील पाच जणांचा गुदमरून मृत्यू झालाय. यात माणिकराव गोविंद काळे, (वय ६५), संदीप माणिक काळे (वय ३६), अनिल बापूराव काळे (वय ५८), विशाल अनिल काळे (वय २३), बाबासाहेब पवार (वय ३५) वर्ष हे सहा जण शेणाचा शोषखड्डा विहिरीमध्ये (Biogas Pit) अडकले होते. त्यांना काढण्याची रेस्क्यू ऑपरेशन करण्यात आले. याप्रसंगी नेवासा पोलीस स्टेशनचे (Newasa Police Station) पोलीस अधिकारी उपस्थित होते. या घटनेमुळं नेवासा तालुक्यामध्ये मोठी खळबळ उडाली आहे.
ऐन गुढीपाडव्याच्या दिवशी घडली घटना : वाकडी या गावात एका शेतकऱ्याने बायोगॅससाठी खड्डा खोदला होता. त्या खड्ड्यामध्ये शेणाची स्लरी तयार करण्यात आली होती. खड्ड्यात एक मांजर पडले म्हणून विशाल काळे मांजरला काढण्यासाठी खड्ड्यामध्ये उतरले आणि त्याचा गुदमरून मृत्यू झाला. ऐन गुढीपाडव्याच्या (Gudi Padwa)दिवशी ही घटना घडल्यानं परिसरामध्ये दुःख व्यक्त केलं जातंय.
गुदमरून पाच जणांचा मृत्यू : विशाल काळे काढण्याकरता दुसरा, तिसरा, चौथा, पाचवा, सहावा असे सहा लोक उतरले होते. त्यातील पाच लोकांचा जागेवर गुदमरून मृत्यू झाला. तर सहावा विजय माणिक काळेवर रुग्णालयात उपचार सुरू आहेत. या ठिकाणी गावातील पोलीस पाटील, नेवासा पोलीस स्टेशनचे पोलीस अधिकारी, तसेच या भागातील नेते विठ्ठल रावजी लंघे, तसेच तालुक्यातील ग्रामस्थ मोठ्या संख्येने उपस्थित होते.