नागपूर : ज्या वयात मुलांना धड लिहिता, वाचता येत नाही, त्या वयात एक साडेसहा वर्षाचा चिमुकला चक्क 'होरा चक्रा'चा अभ्यास करतोय. या चिमुकल्या मुलानं सोमवार ते रविवार या सात दिवसाचे वार कसे तयार झाले? त्यात किती होरे असतात? होरा म्हणजे काय? यासह अनेक विषयांचा अगदी सखोल अभ्यास केलाय. हा चिमुकला दुसरा तिसरा कुणीही नसून नागपूरचा 'गुगल बॉय' अनिश अनुपम खेडकर आहे. अनिशला स्पेस सायन्स, रॉकेट, जेट फ्लाईट, हेलिकॉप्टर यासह जगातील अनेक देशांच्या चलनांची माहिती आहे.
अनिश 2 वर्षांचा असताना नागपूरला आजीकडं राहायला आला होता. अनिशचे वडील अनुपम यांना नोकरीच्या निमित्तानं शहर बदलावं लागतं असल्यानं अनिशची आई कल्याणी खेडकर काही काळासाठी आईकडं नागपूरला राहायला आल्या. सुरुवातीला अनिश नुकताचं चालायला आणि बोलायला शिकत असताना तो अंतराळच्या चित्रांमध्ये रमायचा. अवघ्या दोन वर्षांच्या अबोल बालकाची अंतराळातील आवड थक्क करणारी होती. येथून अनिशच्या असामान्य बुद्धीमत्तेला आकार देण्याचा प्रवास सुरू झाला.
अनिशनं केला होरा चक्राचा अभ्यास : असं म्हणतात की 'होरा चक्र'हे ज्योतिष शास्त्राचा प्रमुख भाग आहे. या होरा चक्राचा अभ्यास अनिशनं सुरू केला. यातून त्याला दिवस कसे तयार झाले? वार कसे तयार झाले? त्यात किती होरे असतात? त्यांची भूमिका काय असते? या सर्वांची पूर्ण माहिती मिळाली. आज अनिश या विषयात इतका पारंगत झालाय की भविष्यात तो नक्कीच 'अ‍ॅस्ट्रोनॉमर' म्हणून जगभरात प्रसिद्ध होईल, असा विश्वास ज्योतिषाचार्य आणि होराचक्र अभ्यासक डॉ. भुपेश गाडगे यांनी व्यक्त केलाय.
होरा म्हणजे काय? : 'ईटीव्ही भारत'शी संवाद साधताना अनिशनं होराचक्राची माहिती दिली. त्यानं सांगितलं की, 'अहोरात्र' या संस्कृत शब्दापासून 'होरा' हा शब्द तयार झाला. अह:+रात्र=अहोरात्र. संस्कृतमध्ये अहः म्हणजे सूर्योदयापासूनचा काळ आणि रात्र म्हणजे सूर्यास्तानंतरचा काळ. एका सूर्योद‌यापासून दुसऱ्या सूर्योदयापर्यंतच्या काळाला 1 अहोरात्र किंवा 1 संपूर्ण दिवसरात्र असं म्हणतात. एका अहोरात्रचे एकूण 24 भाग केले, तर त्याच्या एका भागाला 1 'होरा' असं म्हणतात. 'होरा' या शब्दापासूनच 'Hour' हा इंग्रजी शब्द तयार झालाय असं तो सांगतो. 1 होरा=1 तास=1 Hour