कृत्रिम अवयव नोंदणीबाबत होणार विक्रम, मोहन भागवत यांच्या उपस्थितीत होणार उपक्रम

भारत विकास परिषद विकलांग केंद्रातर्फे विकलांग व्यक्तींसाठी अनोखा उपक्रम राबविण्यात येणार आहे. या उपक्रमाला सरसंघचालक मोहन भागवत प्रमुख पाहुणे म्हणून उपस्थित असणार आहेत.

छत्रपती संभाजीनगर : भारत विकास विकलांग केंद्रातर्फे आगळावेगळा विक्रम नोंदवला जाणार आहे. एकाच वेळी 1 हजारहून अधिक विकलांग व्यक्तींना कृत्रिम अवयव देण्यासाठी नोंदणी करण्याचा हा विक्रम असणार आहे. 16 डिसेंबरला सरसंघचालक मोहन भागवत यांच्या उपस्थितीत हा उपक्रम घेतला जाणार असल्याची माहिती संस्थेचे विश्वस्त विनायक खटावकर यांनी दिली. त्यासाठी कोट्यवधींचा निधी लागणार असून लोकसहभागातून हा उपक्रम पूर्ण होईल, असं देखील त्यांनी सांगितलं.

अद्यावत प्रणालीचे अवयव लावणार :विकलांग व्यक्तींसाठी अनेक संघटना कार्यरत आहेत. विशेषतः दोन संस्था मोफत सुविधा पुरवतात, त्यामधे जयपूर फूट आणि भारत विकास केंद्र यांचा समावेश आहे. भारत विकास विकलांग केंद्रांतर्गत अद्यावत प्रणालीचे कृत्रिम अवयव बसवण्याचं काम केलं जात. विकलांग व्यक्तींना आधीपासून बसवण्यात येणाऱ्या जयपूर फूट पेक्षा 60% टक्के कमी वजनाचे मोड्युलर कृत्रिम अवयव तयार करण्यात येत आहेत. एका अवयवाची किंमत साधारणतः 50 हजार इतकी असते. विकलांग व्यक्तींना असे अवयव मोफत बसवण्यात येणार आहेत, अशी माहिती भारत विकास विकलांग केंद्राचे विश्वस्त विनायक खटावकर यांनी दिली. लावण्यात येणारे अवयव नैसर्गिक अवयवांप्रमाणे काम करत असल्यानं विकलांग व्यक्तींना साधारण जीवन जगता येईल, असं त्यांनी सांगितलं.

विक्रमाची होणार नोंद : कृत्रिम अवयव बसवण्यासाठी एक पद्धत असते. त्यासाठी किमान 3 ते 4 महिने आधी संबंधित विकलांग व्यक्तीच्या अवयवाचे मोजमाव घ्यावे लागते. त्यासाठी त्याच्या आजाराविषयी, हात किंवा पायाविषयी योग्य आणि अचूक माहिती घेतली जाते. त्यानंतर सदरील व्यक्तीच्या अनुषंगानं अवयव तयार केले करून बसवले जातात. 16 डिसेंबर रोजी मोजमाप घेतले जाणार असून मार्च महिन्यात ते बसवण्याचं काम केलं जाणार आहे. एकाच वेळी 710 विकलांग लोकांची एकाच वेळी नोंदणी, मोजमाप घेतल्याचा विक्रम नोंदवण्यात आला होता. यावेळी भारत विकास केंद्रांतर्फे 1 हजार लोकांची नोंदणी केली जाणार आहे. असा उपक्रम करण्याची पहिली वेळ असणार असल्यानं 'गिनीज बुक ऑफ रेकॉर्ड'मध्ये नोंद होणार असल्याची माहिती भारत विकास विकलांग केंद्राचे विश्वस्त विनायक खटावकर यांनी दिली.

हेही वाचा