"महिलांना बंदुक बाळगण्याची परवानगी द्या, बंदुका मी घेऊन देईन", शिंदेंच्या नेत्याचं वादग्रस्त वक्तव्य - Amravati Hindu Morcha

Amravati Hindu Morcha : "महिलांना बंदुक बाळगण्याची परवानगी द्या, बंदुका मी घेऊन देईन, असं वक्तव्य शिवसेना शिंदे गटाचे माजी नगराध्यक्ष नानाग्राम नेभनानी यांनी केलंय. अमरावती येथे आज हिंदुत्ववादी संघटनांनी विराट मोर्चाचं आयोजन केले होते. त्यावेळी त्यांनी हे वक्तव्य केलं.

अमरावती Amravati Hindu Morcha : बांगलादेशमधील पीडित हिंदूंच्या सन्मानार्थ आज अमरावती शहरात विराट मोर्चा निघाला. अमरावतीच्या माजी खासदार नवनीत राणा, राज्यसभा सदस्य अनिल बोंडे, भाजपाचे कार्यकर्ते तसेच विश्व हिंदू परिषद, बजरंग दल यांच्यासह विविध संघटना या मोर्चात सहभागी झाल्या. या मोर्चाला संबोधित करताना शिवसेना शिंदे गटाचे माजी नगराध्यक्ष नानाग्राम नेभनानी यांनी "सरकारनं महिलांना संरक्षणासाठी बंदुक बाळगण्याची परवानगी द्यावी, मी अमरावतीतल्या सर्व महिलांना स्वखर्चानं बंदुक देणार," असं वादग्रस्त वक्तव्य केलं.

महिलांना मी बंदुक देणार : "मी मुख्यमंत्री आणि देवेंद्र फडणवीसांना विनंती करतो की, त्यांनी महिलांना बंदुक बाळगण्याची परवानगी द्यावी. त्यांनी जर ही परवानगी दिली तर, अमरावतीत मी स्वतः महिलांना माझ्यातर्फे बंदुक घेऊन देईन. महिलांनी स्वसंरक्षणासाठी आता बंदुक वापरावी. यात दोन-चार चांगली माणसं मारली तरी हरकत नाही, मात्र वाईट माणूस वाचायला नको. अशा प्रकरणात न्यायालयीन खर्चाची जबाबदारी देखील मी स्वतः घेण्यास तयार आहे," असं वक्तव्य नानकराम नेभनानी केलं.

अमरावती पोलिसांचा कडेकोट बंदोबस्त :अमरावती शहरातून सकाळी 11 वाजता विराट मोर्चा निघणार असल्यामुळं सकाळी सात वाजल्यापासूनच राजकमल चौक, जयस्तंभ चौक, मालवीय चौक, कॉटन मार्केट परिसर, इर्विन चौक अशा सर्व महत्त्वाच्या ठिकाणी पोलिसांचा कडेकोट बंदोबस्त तैनात होता. इर्विन चौकातून राजकमलच्या दिशेनं जाणारी आणि येणारी वाहतूक एकाच मार्गानं करण्यात आली होती. या मोर्चादरम्यान कुठलाही अनुचित प्रकार घडू नये, यासाठी दंगा नियंत्रण पथक देखील तैनात होतं.

राजकमल चौकात हनुमान चालीसा पठण : राजकमल चौक येथे सर्वात आधी हनुमान चालीसा पठण करण्यात आलं. यानंतर मोर्चाला सुरुवात झाली. जयस्तंभ चौक येथेनवनीत राणा या मोर्चात सहभागी झाल्या त्यांनी या ठिकाणी ध्वज पूजन केलं. यानंतर विविध घोषणा देत हा मोर्चा इर्वीन चौकाच्या दिशेनं निघाला.

इर्विन चौकात जाहीर सभा : इर्विन चौक येथे डॉ. बाबासाहेब आंबेडकरांच्या पुतळ्याला यावेळी खासदार अनिल बोंडे यांच्यासह मान्यवरांनी अभिवादन केलं. यानंतर याच परिसरात बांगलादेशातील हिंदूंच्या समर्थनासाठी जाहीर सभा घेण्यात आली. बांगलादेश देशाची निर्मिती झाली, त्यावेळी त्या देशात सात कोटी हिंदू होते. मात्र आज ही संख्या एक कोटीवर आली आहे. खरंतर हिंदूंसाठी ही धोक्याची घंटा आहे. बांगलादेशमध्ये हिंदूंवर होणाऱ्या अत्याचाराविरोधात भारतातील प्रत्येक हिंदूंनी आवाज उठवायला हवा." असं अनिल बोंडे म्हणाले.

हेही वाचा