मनिका बत्राचं लक्षणीय यश; ऑलिम्पिकमध्ये 'अशी' कामगिरी करणारी ठरली पहिली भारतीय महिला - Paris Olympics 2024

Paris Olympics 2024 Table Tennis : पॅरिस ऑलिम्पिक 2024 च्या तिसऱ्या दिवशी भारताची स्टार पॅडलर मनिका बत्रा हिने इतिहास रचला आहे. ऑलिम्पिक इतिहासात मनिका टेबल टेनिसमधील फेरी-16 साठी पात्र ठरणारी पहिली भारतीय ठरली आहे.

पॅरिस Paris Olympics 2024 : भारताची स्टार पॅडलर मनिका बत्रा ही टेबल टेनिसमधील राऊंड-16 साठी पात्र ठरणारी ऑलिम्पिक इतिहासातील पहिली भारतीय महिला टेबल टेनिस खेळाडू ठरली आहे. टेबल टेनिस महिला एकेरीच्या 32 फेरीच्या सामन्यात बत्रानं फ्रेंच खेळाडू प्रितिका पावडेचा 4-0 असा पराभव केला.

असा मिळवला विजय : मनिकाने महिला एकेरीच्या राउंड ऑफ 32 सामन्यात शानदार सुरुवात केली. 36 मिनिटं चाललेल्या या सामन्यात मनिकानं फ्रान्सच्या प्रितिका पावडेचा 11-9, 11-6, 11-9, 11-7 असा पराभव केला आणि राउंड- 16 मध्ये आपलं स्थान निश्चित केलं. जागतिक क्रमवारीत मनिका बत्रा 28 व्या स्थानावर आहे आणि प्रितिका पावडे मानिकापेक्षा दहा स्थानांनी वर आहे. मनिकानंं यापूर्वी 64 च्या फेरीत ब्रिटनच्या ॲना हर्सीचा पराभव केला होता. यामध्ये तिनं फक्त एक सेट गमावला होता. 32 च्या फेरीत मनिकाचा पुढील सामना हाँगकाँगच्या झू सी आणि जपानच्या एम हिरानोशी होईल. पॅरिस ऑलिम्पिकमध्ये मनिका बत्रा पदकाची दावेदार आहे. मात्र पदक जिंकण्यासाठी तिला नॉकआऊट सामन्यांमध्येही अशाच प्रकारची कामगिरी करावी लागेल.

चीनचं साम्राज्य मोडणार? : पॅरिस ऑलिम्पिकमध्ये भारताचे ध्वजवाहक अचंता शरथ कमल आणि हरमीत देसाई यांना चांगली कामगिरी करता आली नाही. दोन्ही खेळाडू पदकाच्या शर्यतीतून बाहेर पडले आहेत. पुरुष एकेरीत अचंता शरथ कमल आणि हरमीत देसाई 16 च्या फेरीत बाहेर पडले. 1988 पासून टेबल टेनिस स्पर्धा ऑलिंपिकमध्ये चीनच्या खेळाडूंच वर्चस्व आहे. चीनने 37 स्पर्धांमध्ये एकूण 60 पदकं जिंकली. त्यामुळं मनिका बत्रा या ऑलिम्पिकमध्ये चीनचं साम्राज्य मोडून काढणार का? हे पाहावं लागेल .

हेही वाचा