सिडनी Most Sixes in Women's T20 Match : ऑस्ट्रेलियात सुरु असलेल्या महिला बिग बॅश लीगच्या 21व्या सामन्यात होबार्ट हरिकेन्सनं पर्थ स्कॉचर्सचा 72 धावांनी पराभव केला. या सामन्यात लिझेल लीनं होबार्ट हरिकेन्ससाठी अशा प्रकारे फलंदाजी केली जी महिला क्रिकेट सामन्यात क्वचितच पाहायला मिळते. तिनं विरोधी संघाच्या गोलंदाजांचा पुरेपूर फायदा घेत झंझावाती दीडशतक झळकावलं. तिच्या चमकदार कामगिरीसाठी तिला 'मॅन ऑफ द मॅच' म्हणून निवडण्यात आले.
लिझेल लीची 150 धावांची उत्कृष्ट खेळी :लिझेल लीनं अवघ्या 75 चेंडूत 150 धावा केल्या. या खेळीत तिनं 12 चौकार आणि 12 षटकार मारले. महिला बिग बॅग लीगच्या इतिहासातील ही सर्वोच्च वैयक्तिक धावसंख्या आहे. तसंच यासह लिझेल ली महिला क्रिकेटच्या कोणत्याही T20 सामन्यात सर्वाधिक षटकार मारणारी खेळाडू ठरली आहे. तिनं ग्रेस हॅरिस आणि लॉरा अगाथा यांचा जागतिक विक्रम मोडला आहे. या दोन्ही खेळाडूंच्या नावावर महिला T20 सामन्यात प्रत्येकी 11 षटकार मारण्याचा विक्रम होता. आता लिझेल लीनं तिच्या इनिंगमध्ये 12 षटकार मारुन शानदार कामगिरी केली आहे.
महिला T20 क्रिकेटच्या कोणत्याही सामन्यात सर्वाधिक षटकार ठोकणारी खेळाडू :
- लिझेल ली (होबार्ट हरिकेन्स) - 12
- ग्रेस हॅरिस (ब्रिस्बेन हीट) - 11
- लॉरा अगाथा (ब्राझील) - 11
- ऍशले गार्डनर (सिडनी सिक्सर्स) - 10
- डिआंड्रा डॉटिन (वेस्ट इंडिज) - 9