मेलबर्न AUS Beat IND by 184 Runs: मेलबर्न येथील बॉक्सिंग-डे कसोटीचा निकाल भारतीय क्रिकेट संघाच्या बाजूनं लागला नाही. यात ऑस्ट्रेलियानं विजय मिळवत मालिकेतही 2-1 नं आघाडी घेतली आहे. मेलबर्न कसोटीत ऑस्ट्रेलियानं भारतासमोर विजयासाठी 340 धावांचं लक्ष्य ठेवलं होतं, ज्याचा पाठलाग करताना भारताचा दुसऱ्या डावात सहज पराभव झाला. एकूण 300 पेक्षा जास्त धावांचा पाठलाग करताना भारताला पराभवाचा सामना करावा लागण्याची ही कसोटी क्रिकेटमधील 49वी वेळ आहे.
टीम इंडियानं गमावली इतिहास रचण्याची संधी : चौथ्या दिवशी 9 गडी गमावून 333 धावांची आघाडी घेणाऱ्या ऑस्ट्रेलियानं पाचव्या दिवशी आपल्या धावसंख्येत आणखी 6 धावांची भर घातली आणि भारताला 340 धावांचं लक्ष्य दिलं. हे लक्ष्य पार करणं म्हणजे एमसीजीमध्ये टीम इंडियासाठी इतिहास रचण्यासारखं झालं असतं कारण आतापर्यंत या मैदानावर सर्वात यशस्वी धावांचा पाठलाग 332 धावांचा होता. पण, असं होऊ शकलं नाही.
जयस्वाल वगळता सर्व फलंदाजांचं अपयश : मेलबर्न कसोटीत भारताचा दुसरा डाव अवघ्या 155 धावांवर आटोपला. भारतीय संघाकडून सलामीवीर यशस्वी जैस्वालनं सर्वाधिक 84 धावा केल्या. त्यानं तब्बल 208 चेंडूंचा सामना करत या धावा केल्या. जैस्वाल व्यतिरिक्त, ऋषभ पंत संघाचा दुसरा सर्वाधिक धावा करणारा खेळाडू होता, ज्यानं 340 धावांच्या लक्ष्याचा पाठलाग करताना 30 धावांची खेळी केली.
नऊ फलंदाज एकेरी धावसंख्येवर बाद :यशस्वी आणि पंत वगळता इतर कोणताही फलंदाज दुहेरी आकडा ओलांडू शकला नाही, हेच एक प्रमुख कारण आहे की भारतीय संघ मेलबर्न कसोटी जिंकू शकला नाही किंवा अनिर्णित राखू शकला नाही. रोहित शर्मानं 9 आणि विराट कोहलीनं 5 धावा केल्या. केएल राहुलला सलग दुसऱ्या डावात अपयश आलेलं पाहून भारतीय संघ व्यवस्थापनाचा त्याला तिसऱ्या क्रमांकावर खेळवण्याचा निर्णय चुकीचा होता असं वाटतं.
ऑस्ट्रेलियाला पहिल्या डावात 105 धावांची आघाडी : मेलबर्न कसोटीत प्रथम खेळताना ऑस्ट्रेलियानं पहिल्या डावात 474 धावा केल्या होत्या. प्रत्युत्तरात भारतानं पहिल्या डावात 369 धावा केल्या होत्या. पहिल्या डावात 105 धावांची आघाडी घेऊन खेळताना ऑस्ट्रेलियानं दुसऱ्या डावात 234 धावा केल्या. जसप्रीत बुमराहनं मेलबर्न कसोटीत भारताकडून सर्वाधिक 9 विकेट घेतल्या. ऑस्ट्रेलियाकडून पॅट कमिन्स आणि नॅथन लायन यांनी 6-6 विकेट घेतल्या.
पराभवानंतर भारताला WTC मध्ये मोठं नुकसान : जर आपण भारतीय संघाबद्दल बोललो तर या सामन्यापूर्वी भारताचा पीसीटी 55.88 होता, जो आता 52.77 वर आला आहे. म्हणजेच भारतीय संघाचं मोठं नुकसान झालं आहे. आता फायनलचा मार्ग त्याच्यासाठी बंद नसला तरी हा मार्ग खूपच कठीण आहे आणि तो चुकण्याची शक्यता आहे. अंतिम फेरी गाठणं आता भारतीय संघाच्या हातात नाही, इतर संघांच्या विजय-पराजयावर अवलंबून राहावं लागेल.
हेही वाचा :
- क्रेझ असावी तर अशी... ऑस्ट्रेलिया-भारत मॅच पाहण्यासाठी MCG वर आले 351104 पेक्षा जास्त दर्शक
- रोहित शर्माची विकेट घेताच कांगारुच्या कर्णधारानं रचला नवा इतिहास
