मोकी (चीन) India vs China Hockey Final :आशियाई हॉकी चॅम्पियन्स ट्रॉफीच्या अंतिम सामन्यात भारतानं चीनचा 1-0 असा पराभव करत विजेतेपद पटकावलं. पहिले तीन क्वार्टर गोलशून्य राहिल्यानंतर भारतानं चौथ्या आणि शेवटच्या क्वार्टरमध्ये शानदार गोल करत 1-0 अशी आघाडी घेतली, जी शेवटपर्यंत कायम राहिली. भारताच्या जुगराज सिंगनं सामन्यातील एकमेव गोल केला. भारतानं आशियाई चॅम्पियन्स ट्रॉफी जिंकण्याची ही पाचवी वेळ आहे.
या सामन्यात सुरुवातीला दोन्ही संघांकडून एकही गोल करण्यात यश आलं नाही. हाफ टाईमपर्यंत स्कोअर 0-0 असा राहिला. भारतीय संघ गोल करण्यासाठी धडपड करत राहिला पण काही यश मिळालं नाही. हाफ टाइमपर्यंत भारताला 5 पेनल्टी कॉर्नर मिळाले. तिसरा क्वार्टरही गोलशून्य राहिला. एकाही संघाला गोल करता आला नव्हता.
51व्या मिनिटाला जुगराज सिंगनं केला गोल : भारतानं चौथ्या क्वार्टरमध्ये चीनवर जोरदार आक्रमणं केलं. तब्बल 51व्या मिनिटाला भारताचा स्टार खेळाडू जुगराज सिंगनं अप्रतिम गोल करत भारताचं खातं उघडलं. या गोलमुळं भारतानं चीनवर 1-0 अशी आघाडी घेतली. यानंतर चीनच्या खेळाडूंनी शेवटच्या क्षणापर्यंत बरोबरी साधण्याचा प्रयत्न केला. पण, भारतानं अंतिम सामना 1-0 असा जिंकून आशियाई चॅम्पियन्स ट्रॉफीचं विजेतेपद पटकावलं.
चॅम्पियन्स ट्रॉफी भारताच्या विजयाचा इतिहास :आशियाई चॅम्पियन्स ट्रॉफी 2011 मध्ये भारतानं अंतिम सामन्यात पाकिस्तानला पेनल्टी शूटआउटमध्ये 4-2 नं पराभूत करून विजेतेपद पटकावलं. त्यानंतर 2016 मध्ये भारतानं पुन्हा एकदा पाकिस्तानचा 3-2 असा पराभव करत विजेतेपदावर नाव कोरलं. 2018 मध्ये भारत आणि पाकिस्तान यांना संयुक्त विजेता घोषित करण्यात आलं. 2023 मध्ये झालेल्या चॅम्पियन्स ट्रॉफीच्या अंतिम सामन्यात भारतानं मलेशियाचा 4-3 असा पराभव करून चौथ्यांदा विजेतेपद पटकावलं. यंदा पुन्हा विजेतेपद पटकावलं.
हेही वाचा
- नरेंद्र मोदी, अमित शाह ते शरद पवार 'यांनी' राजकारणासोबतच गाजवलंय क्रिकेटचं मैदान - Political Interference in Cricket
- कॅनडा विरुद्ध नेपाळ पहिला ODI सामना भारतात पाहता येणार लाईव्ह, वाचा सर्व अपडेट - CAN vs NEP 1st ODI Live in India
- रक्तरंजित कसोटी सामना... अवघ्या 62 चेंडूत संपला इतिहासातील सर्वात लहान सामना, स्वतःचा जीव वाचवत होते खेळाडू - Shortest Test Cricket Match
