पंतप्रधान नरेंद्र मोदी आज मुंबईत; विविध विकासकामांचं करणार लोकार्पण - PM Modi In Mumbai

PM Modi In Mumbai Today : पंतप्रधान नरेंद्र मोदी आज (13 जुलै) मुंबई दौऱ्यावर असून लोकसभा निवडणुकीनंतर ते पहिल्यांदाच मुंबईत येताय. विशेष म्हणजे पंतप्रधान नरेंद्र मोदी यावेळी बृहन्मुंबई महानगरपालिकेच्या कामांचं भूमिपूजन करणार आहेत. त्यामुळं पंतप्रधान मोदींचा मुंबई दौरा म्हणजे निवडणुकांच्या पार्श्वभूमीवर प्रचाराचं भूमिपूजन तर नाही ना? असा प्रश्न सध्या उपस्थित होतोय.

मुंबई PM Modi In Mumbai Today : देशाच्या पंतप्रधान पदी तिसऱ्यांदा विराजमान झाल्यानंतर नरेंद्र मोदी आज (13 जुलै) पहिल्यांदाच मुंबई दौऱ्यावर येत आहेत. या दौऱ्यादरम्यान विविध विकासकामांचं उद्घाटन आणि भूमिपूजन पंतप्रधान मोदींच्या हस्ते करण्यात येईल. तसंच मुंबईच्या पूर्व आणि पश्चिम उपनगरांना जोडणाऱ्या महत्वाकांक्षी असलेल्या गोरेगाव-मुलुंड जोड रस्ता प्रकल्प (तिसरा टप्पा) अंतर्गत संजय गांधी राष्ट्रीय उद्यानाखालून जाणाऱ्या जुळ्या बोगद्याच्या कामाचं भूमिपूजन देखील पंतप्रधान नरेंद्र मोदी यांच्या हस्ते पार पडणार आहे.

'या' विकासकामांचं करणार लोकार्पण :पंतप्रधान नरेंद्र मोदी हे सायंकाळी 5.30 वाजेच्या सुमारास मुंबईत दाखल होतील. सर्वप्रथम गोरेगाव पूर्व येथील नेस्को एक्झिबिशन सेंटर इथं ते विविध प्रकल्पांचं उद्घाटन करतील. त्यानंतर सायंकाळी 7 वाजेच्या दरम्यान इंडियन न्यूजपेपर सोसायटीच्या इमारतीचं उद्घाटन करण्यात येईल. 29, 400 कोटी रुपयांहून अधिक खर्चाच्या विविध प्रकल्पांचं लोकार्पण आणि पायभरणी पंतप्रधान मोदी आज करतील. त्यामध्ये ठाणे बोरवली दुहेरी बोगदा प्रकल्पाची पायाभरणी, गोरेगाव मुलुंड लिंक रोड प्रकल्पाच्या बोगद्याच्या कामाचं भूमिपूजन, नवी मुंबईतील गतिशक्ती मल्टी मॉडल कार्गो टर्मिनलच्या कामाची पायाभरणी, कल्याण यार्ड रिमोल्डिंगच्या कामाची पायाभरणी, लोकमान्य टिळक टर्मिनस वरील नवीन प्लॅटफॉर्मचं लोकार्पण, यांचा समावेश आहे. 5,600 कोटी रुपये खर्चाच्या मुख्यमंत्री युवा कार्य शिक्षण योजनेचा शुभारंभही पंतप्रधान मोदींच्या हस्ते करण्यात येईल.

किशोरी पेडणेकरांची टीका :पंतप्रधान मोदींच्या दौऱ्यावरुन बृहन्मुंबई महानगरपालिकेच्या माजी महापौर किशोरी पेडणेकर यांनी टीका केलीय. त्या म्हणाल्या, "बृहन्मुंबई महानगरपालिकेच्या प्रकल्पांच्या भूमिपूजनासाठी पंतप्रधानांना आमंत्रित केलं जातंय. याचा अर्थ इथले सध्या पदावर असलेले नेते कुठेतरी कमी पडतायत. बृहन्मुंबई महानगरपालिका ही एकमेव महानगरपालिका नाही. महाराष्ट्रात अशा सतरा महानगरपालिका आहेत. देशात किती असतील, याचा विचार करा. मात्र, पंतप्रधान केवळ मुंबई महानगरपालिकेच्या प्रकल्पांच्या भूमिपूजनासाठी इकडं येतात. लोकसभा निवडणूक काळात पंतप्रधानांनी 17 वेळा महाराष्ट्राचा दौरा केला. त्यात 4 वेळा ते मुंबईला आले. आता पुन्हा महानगरपालिकेच्या कामांच्या भूमिपूजनासाठी ते मुंबईत येत आहेत. यातून या लोकांना नेमकं काय साध्य करायचंय?".

हेही वाचा -