"मी उंटावरुन शेळ्या हाकणारा मुख्यमंत्री नाही", एकनाथ शिंदेंचा उद्धव ठाकरेंवर हल्लाबोल

Eknath Shinde On Uddhav Thackeray : मुख्यमंत्री एकनाथ शिंदे यांच्या हस्ते आज (9 मार्च) सातारा जिल्ह्यातील विविध प्रकल्पांचं लोकार्पण झालं. त्यानंतर येथे घेण्यात आलेल्या सभेत मुख्यमंत्री शिंदेंनी शिवसेना ठाकरे गटाचे प्रमुख उद्धव ठाकरे यांच्यावर टीका केली आहे.

सातारा Eknath Shinde On Uddhav Thackeray : सातारा जिल्हा दौऱ्यावर आलेल्या मुख्यमंत्री एकनाथ शिंदे यांच्या हस्ते आज (9 मार्च) दरे येथील बांबू मूल्यवर्धन केंद्र, टसर रेशीम शाश्वत रोजगार व वनसंवर्धन प्रकल्पाचं लोकार्पण, गाळमुक्त धरण, गाळयुक्त शिवार योजनेचा शुभारंभ आणि पाटणमधील दरडग्रस्तांच्या पुनर्वसन या प्रकल्पाचं भूमिपूजन झालं. त्यानंतर तेथे घेतलेल्या सभेत बोलत असताना मुख्यमंत्र्यांनी ठाकरे गटाचे प्रमुख उद्धव ठाकरे यांच्यावर निशाणा साधला. तसंच घरात बसून उंटावरून शेळ्या हाकणारा मी मुख्यमंत्री नाही, असा टोलाही त्यांनी लगावला.

नेमकं काय म्हणाले एकनाथ शिंदे? : यावेळी बोलत असताना एकनाथ शिंदे म्हणाले की, "राज्यात सातशे ठिकाणी 'बाळासाहेब ठाकरे आपला दवाखाना ' सुरू केला आहे. याचं कारण म्हणजे सरकारने घेतलेले निर्णय, केलेलं काम, यामुळं विरोधकांना उठलेला पोटशूळ, झालेली पोटदुखी त्यांचा इलाज पण बाळासाहेब ठाकरे आपला दवाखान्यात मोफत होतोय", असा हल्लाबोल मुख्यमंत्री शिंदे यांनी केला. तसंच हे सर्वसामान्यांचं आणि संकट काळात लोकांना वाचवणारं सरकार आहे. घरात बसून उंटावरून शेळ्या हाकणारा मी मुख्यमंत्री नाही, असा टोलाही यावेळी त्यांनी नाव नं घेता उद्धव ठाकरेंना लगावला. तर सोन्याचा चमचा घेऊन ज्यांचा जन्म झाला, त्यांनाच मुख्यमंत्री होण्याचा अधिकार आहे का? शेतकऱ्याच्या मुलानं मुख्यमंत्री होऊ नये का? हेलिकॉप्टरमधून फिरू नये, असं काही बंधन आहे का? का फक्त व्हिडिओग्राफी करत हेलिकॉप्टरने फिरावं, असा काही नियम आहे?, असे सवाल करत त्यांनी विरोधकांचा समाचार घेतला.

पर्यटन प्रकल्पामुळं रोजगाराच्या संधी : गाळमुक्त धरण आणि गाळयुक्त शिवार उपक्रमामुळं कोयना धरणाच्या पाणीसाठ्यात 10 टीएमसीनं वाढ होईल, असा विश्वास मुख्यमंत्री एकनाथ शिंदे यांनी व्यक्त केला. तसंच जावळी तालुक्यातील मुनावळे प्रमाणेच पाटणमधील जलपर्यटन प्रकल्पासाठी ७० कोटी रुपयांचा निधी मंजूर करण्यात आला असल्याचंही सांगितलं. पर्यटनाला चालना देण्यासाठी 426 कोटी रुपये मंजूर केले आहेत. पर्यावरणाचा समतोल राखून सर्व प्रकल्प पूर्ण करावेत, असे निर्देशही त्यांनी यावेळी दिले.

पोटशूळ उठलेल्या विरोधकांवर मोफत उपचार : पुढं ते म्हणाले की, "शासन आपल्या दारी उपक्रमातून राज्यातील 4 कोटी लोकांना योजनांचा लाभ देण्यात आला आहे. राज्यात 700 ठिकाणी 'बाळासाहेब ठाकरे आपला दवाखाना' सुरु करण्यात आले आहेत. सरकारच्या कामांमुळं पोटशूळ उठलेल्यांवर त्याठिकाणी मोफत उपचार होत आहेत", असा खोचक टोलाही मुख्यमंत्र्यांनी आपल्या विरोधकांना लगावला.

हेही वाचा -