मुंबई - Rani Mukreji 46th birthday : हिंदी चित्रपटसृष्टीमधील सुंदर अभिनेत्री राणी मुखर्जी आज 21 मार्च रोजी तिचा 46 वा वाढदिवस साजरा करत आहे. राणीचा जन्म 21 मार्च 1978 रोजी मुंबईत झाला आणि तिनं बंगाली चित्रपटांमधून आपल्या अभिनय कारकिर्दीला सुरुवात केली. राणीनं तिचा 46वा वाढदिवस मोठ्या थाटामाटात साजरा केला आहे. दरम्यान, अनेकजण सोशल मीडियावर राणीला तिच्या वाढदिवसाच्या शुभेच्छा देत आहेत. याशिवाय राणीच्या वाढदिवसाच्या सेलिब्रेशनमधील काही व्हिडिओ सोशल मीडियावर व्हायरल झाले आहेत. या व्हिडिओमध्ये ती केक कट करताना दिसत आहे.
राणी मुखर्जीचा वाढदिवस : या विशेष प्रसंगी तिनं पांढरा शुभ्र ड्रेस परिधान केला आहे. यावेळी पापाराझी तिचे सुंदर फोटो आणि व्हिडिओ काढत आहेत. तिनं केक कापल्यानंतर पापाराझीला देखील दिला. वाढदिवसाच्या सेलिब्रेशनला उपस्थित असलेल्या सर्वांनी राणीला वाढदिवसाच्या खूप खूप शुभेच्छा दिल्या आहेत. यानंतर राणी देखील गोड हसत वाढदिवसाच्या शुभेच्छा देणाऱ्यांचे आभार मानले. राणीच्या वाढदिवसामधील एका व्हिडिओच्या पोस्टवर चाहत्यानं लिहिलं, ''राणीजी वाढदिवसाच्या खूप खूप शुभेच्छा, तुम्ही खूप सुंदर दिसत आहात.'' दुसऱ्यानं लिहिलं, ''सर्वांच्या मनामधील राणीला वाढदिवसाच्या शुभेच्छा.'' आणखी एकानं लिहिलं, ''आजही ती खूप क्यूट आहे, वाढदिवसाच्या शुभेच्छा.'' अशा अनेक कमेंट्स या पोस्टवर येत आहेत. याशिवाय काहीजण हार्ट आणि फायर इमोजी पोस्ट करत राणीवर प्रेमाचा वर्षाव करताना दिसत आहेत.