मुंबई - Pooja Hegde and Ahan Shetty : अभिनेता सुनील शेट्टीचा मुलगा अहान शेट्टी हा पुन्हा एकदा हिंदी चित्रपटसृष्टीत पुनरागमन करत आहे. त्याचा डेब्यू चित्रपट 'तडप' (2021) बॉक्स ऑफिसवर काही खास काम करू शकला नव्हता. आता तीन वर्षांनंतर अहान शेट्टी आणखी एक चित्रपटातून स्वत:ला सिद्ध करण्यासाठी सज्ज झाला आहे. अहान शेट्टी 'सनकी' चित्रपटामध्ये दिसणार आहे. आज 9 मार्च रोजी 'सनकी' चित्रपटाची घोषणा करण्यात आली आहे. 'सनकी'मध्ये अहान हा साऊथ अभिनेत्री पूजा हेगडेबरोबर स्क्रिन शेअर करताना दिसणार आहे. या चित्रपटाची निर्मिती साजिद नाडियादवाला करणार आहे.
अहान शेट्टी स्टारर 'सनकी' चित्रपट : नाडियाडवाला ग्रँडसननं आपल्या ऑफिशियल पेजवर 'सनकी'बद्दल घोषणा करून यातील स्टारकास्टबद्दलची माहिती दिली आहे. 'सनकी' या चित्रपटाच्या प्रदर्शनाची तारीख अद्यापही समोर आलेली नाही. या चित्रपटाचं दिग्दर्शन अदनान शेख आणि यासिर शाह करणार आहेत. 'सनकी' चित्रपटाची कहाणी रजत अरोरा यांनी लिहिली आहे. हा एक प्रेम-रोमँटिक ड्रामा चित्रपट आहे. 'सनकी'कडून अहानला खूप अपेक्षा आहेत. अहान शेट्टी हा अनेक दिवसांपासून हिंदी चित्रपटसृष्टीत एका चांगल्या प्रोजेक्टच्या प्रतीक्षेत होता. 'सनकी'ची घोषणा झाल्यानंतर सुनील शेट्टी हा खूप खूश झाला असून त्यानं आपला आनंद सोशल मीडियावर शेअर केला आहे.