दिल्ली दारू घोटाळा प्रकरण : बीआरएस नेत्या के कविता यांच्या न्यायालयीन कोठडीत वाढ - Delhi Excise Policy Case

Delhi Excise Policy Case : भारत राष्ट्र निर्माण समितीच्या नेत्या के कविता यांना दिल्ली दारू घोटाळ्यात अटक करण्यात आली आहे. के कविता यांना न्यायालयानं न्यायालयीन कोठडी ठोठावली होती. दरम्यान कोठडी संपल्यानं त्यांना पुन्हा न्यायालयात हजर केलं असता, न्यायालयानं त्यांना 23 एप्रिलपर्यंत न्यायालयीन कोठडी ठोठावली आहे.

नवी दिल्ली Delhi Excise Policy Case :दिल्ली दारू घोटाळा प्रकरणी अटकेत असलेल्या बीआरएस नेत्या के कविता यांना पुन्हा एकदा न्यायालयानं धक्का दिला आहे. राऊस अव्हेन्यू कोर्टानं त्यांच्या न्यायालयीन कोठडीत 23 एप्रिलपर्यंत वाढ केली. सीबीआय कोठडी संपल्यानंतर त्यांना सोमवारी न्यायालयात हजर करण्यात आलं. न्यायालयात सीबीआयनं के कविता यांना 14 दिवसांची न्यायालयीन कोठडी देण्याची मागणी केली. ईडी प्रकरणातही त्यांची कोठडी 23 एप्रिलला संपत आहे. त्यानंतर के कविता यांना पुन्हा न्यायालयात हजर करण्यात येणार असल्याची माहिती सूत्रांनी दिली आहे.

सीबीआयनं 11 एप्रिलला केलं होतं अटक :दिल्ली दारू घोटाळ्यात सीबीआयनं बीआरएस नेत्या के कविता यांना 11 एप्रिलला अटक केली होती. दिल्ली दारू घोटाळ्यात के कविता यांचाही सहभाग असल्याचा आरोप सीबीआयनं केला. या अगोदर के कविता या दिल्ली दारू घोटाळ्याशी संबंधित मनी लाँड्रींग प्रकरणात न्यायालयीन कोठडीत होत्या. या प्रकरणी सीबीआयनं 6 एप्रिलला के कविता यांची न्यायालयीन कोठडीत चौकशी केली होती. या प्रकरणी 5 एप्रिलला न्यायालयानं सीबीआयला के कविता यांची न्यायालयीन कोठडीत चौकशी करण्याची परवानगी दिली होती. ईडीनं 15 मार्चला हैदराबादमध्ये छापेमारी करत के कविता यांना अटक केली होती.

के कविता यांना पोहोचला नफा, ईडीचा आरोप :के कविता यांच्यावर ईडीनं गंभीर आरोप केले आहेत. के कविता यांना 33 टक्के नफा एका कंपनीच्या माध्यमातून पोहोचवण्यात आला. के कविता या दक्षिणेतील दारू व्यापाऱ्यांशी संबंधित होत्या. त्यामुळे ईडीनं के कविता यांना दोनवेळा समन्स पाठवून चौकशीला बोलावलं होतं. मात्र के कविता यांनी दुर्लक्ष करत ईडी चौकशीला हजर झाल्या नाहीत. त्यानंतर ईडीनं छापा टाकून त्यांना हैदराबादमधून अटक केली.

हेही वाचा :