रक्षाबंधनाच्या मुहूर्तावर भद्राचं सावट: कोणत्या वेळेत बांधावी राखी? जाणून घ्या, शुभ मुहूर्त - Raksha Bandhan 2024

Raksha Bandhan 2024 : श्रावण महिन्यातील शुक्ल पौर्णिमेला (Rakhi Purnima 2024) रक्षाबंधन सण साजरा केला जातो. यंदा 19 ऑगस्ट म्हणजेच आज रक्षाबंधन आहे. रक्षाबंधनाच्या दिवशी यंदा 'भद्राकाळ' (Bhadra Kaal) आहे. त्यामुळं राखी बांधण्यासाठी शुभ मुहूर्त आम्ही तुम्हाला सांगणार आहोत. वाचा सविस्तर....

हैदराबाद Raksha Bandhan 2024 :रक्षाबंधन (Rakhi Purnima 2024) हा बहीण आणि भावाच्या प्रेमाचा हा सण. या दिवशी बहीण भावाच्या मनगटावर राखी बांधते आणि भाऊ तिचे रक्षण करण्याचं वचन देतो. संपूर्ण भारतात रक्षाबंधनाचा सण अत्यंत उत्साहात साजरा केला जातो. रक्षाबंधन दिवशी भद्राकाळ असल्यानं राखी बांधण्यासाठी शुभ मुहूर्त हा दुपारनंतर सुरू होतो.

कधी आहे भद्राकाळ (Bhadra Kaal):18 ऑगस्टला रात्री 2 वाजून 21 मिनिटांपासून ते 19 ऑगस्टला दुपारी 1 वाजून 24 मिनिटांपर्यंत 'भद्राकाळ' आहे.

राखी बांधण्यासाठी शुभ मुहूर्त : 19 ऑगस्टला दुपारी 1 वाजून 26 मिनिटं ते सायंकाळी 6 वाजून 25 मिनिटांपर्यंत राखी बांधण्यासाठी शुभ मुहूर्त आहे.

भद्राकाळ संपल्यानंतर बांधा राखी : रक्षाबंधनाच्या दिवशी भद्राकाळ असतो. या काळात राखी बांधनं वर्जित असतं. या वर्षी रक्षाबंधनाच्या दिवशी म्हणजे 19 ऑगस्टला 1 वाजून 24 मिनिटांपर्यंत भद्राकाळ आहे. त्यामुळं भद्राकाळ संपल्यानंतर रक्षाबंधनाचा मुहूर्त असेल. त्यामुळं बहिणींनी भद्राकाळ संपल्यानंतर भावाला राखी बांधावी.

काय आहे भद्राकाळ: पंचांगाची वार, तिथी, नक्षत्र, योग आणि करण अशी पाच अंगे आहेत. या अंगाचा पंचांगात कालगणनेसाठी विचार करण्यात येतो. त्याचबरोबर जयंती, सण, उत्सव, पुण्यतिथीचा बोध पंचागातून होतो. याच पाच अंगांशी करण आणि भद्राकाळशी संबंध आहे. करण अकरा असतात, त्यातील एक करण म्हणजे विष्टी करण. ज्या दिवशी 'विष्टी' करण असतो त्या दिवशी 'भद्राकाळ' असतो.

भद्राकाळात काय करावे आणि काय करू नये? : भद्राकाळातगृहप्रवेश, तीर्थयात्रा, विवाह, नवीन कामे, मंगलकार्य, इतर महत्त्वाची शुभ कार्ये करू नयेत. युद्ध करणं, शस्त्र वापरणं, शस्त्रक्रिया करणं, यज्ञ हवन इत्यादी करावे. भद्रापासून बचावासाठी शिवाची पूजा करावी आणि भद्राच्या 12 नावांचा अर्थात, धन्या, धधिमुखी, भद्रा, महामारी, खराण्णा, कालरात्री, महारूद्र, विष्ठी, कुल पुत्रिका, भैरवी, महाकाली, असुर शाकरी यांचा जप करावा त्यामुळं भद्राकाळातील संकटातून मुक्ती मिळेल.

हेही वाचा -