ദേശീയപാതയോരത്ത് ഭീഷണിയായി മരങ്ങള്‍; കാത്തിരിക്കുന്നത് അപകടം - ROAD SIDE TREE ISSUE IN IDUKKI

അടിമാലി - കുമളി ദേശീയപാതയോരത്ത് അപകടഭീഷണി സൃഷ്‌ടിച്ച് മരങ്ങള്‍. മരത്തിന്‍റെ ചില്ലകള്‍ റോഡിലേക്ക് ഒടിഞ്ഞ് വീണ് അപകടങ്ങളുണ്ടാകുന്നത് പതിവ്.

ഇടുക്കി:അടിമാലി - കുമളി ദേശീയപാതയില്‍ കത്തിപ്പാറ മുതല്‍ കല്ലാര്‍കുട്ടി വരെയുള്ള ഭാഗങ്ങളില്‍ പാതയോരത്ത് അപകടാവസ്ഥ സൃഷ്‌ടിച്ച് നില്‍ക്കുന്ന മരങ്ങള്‍ മുറിച്ച് നീക്കണമെന്ന ആവശ്യം ശക്തമാക്കി പ്രദേശവാസികൾ. മരത്തിന്‍റെ ശിഖരങ്ങള്‍ റോഡിലേക്കൊടിഞ്ഞ് വീഴുന്നത് ആവര്‍ത്തിക്കുന്നുവെന്നാണ് പരാതി. അപകടങ്ങള്‍ പലപ്പോഴും തലനാരിഴക്കാണ് ഒഴിവായി പോകുന്നതെന്നും പ്രദേശവാസികള്‍ പറയുന്നു

നേര്യമംഗലം വനമേഖലയില്‍ എന്ന പോലെ മഴക്കാലത്ത് മരങ്ങള്‍ അപകടാവസ്ഥ ഉയര്‍ത്തുന്ന പ്രദേശമാണ് അടിമാലി കുമളി ദേശീയപാതയിലെ കത്തിപ്പാറ മുതല്‍ കല്ലാര്‍കുട്ടി വരെയുള്ള ഭാഗം. ഈ ഭാഗത്ത് യാത്രകാര്‍ക്ക് ഭീഷണിയായി നില്‍ക്കുന്ന നിരവധി മരങ്ങളുണ്ട്. മഴ കനക്കുന്ന സാഹചര്യത്തില്‍ പാതയോരത്ത് അപകടാവസ്ഥ ഉയര്‍ത്തി നില്‍ക്കുന്ന മരങ്ങള്‍ മുറിച്ച് നീക്കണമെന്നാണ് ആവശ്യം.

മരശിഖരങ്ങള്‍ റോഡിലേക്കൊടിഞ്ഞ് വീഴുന്നത് ആവര്‍ത്തിക്കുന്നുവെന്നാണ് പരാതി. അപകടങ്ങള്‍ പലപ്പോഴും തലനാരിഴക്കാണ് ഒഴിവായി പോകുന്നതെന്നും പ്രദേശവാസികള്‍ പറയുന്നു. മരങ്ങള്‍ മുറിച്ച് നീക്കി അപകടാവസ്ഥ ഒഴിവാക്കുന്ന കാര്യത്തില്‍ ബന്ധപ്പെട്ട വകുപ്പുകള്‍ നിസംഗത പുലര്‍ത്തുന്നുവെന്നും ആക്ഷേപം ഉണ്ട്. റോഡിനോട് ചേര്‍ന്ന മണ്‍തിട്ടക്ക് മുകളിലും അപകടാവസ്ഥയില്‍ മരങ്ങള്‍ നിലപതിക്കും വിധം നില്‍ക്കുന്നുണ്ട്.

സ്‌കൂള്‍ വാഹനങ്ങളടക്കം കടന്ന് പോകുന്ന റോഡില്‍ എല്ലായിപ്പോഴും യാത്രക്കാരുടെ തിരക്കുണ്ട്. വീണ്ടും മഴകനക്കും മുമ്പ് മരങ്ങള്‍ ഉയര്‍ത്തുന്ന അപകട ഭീഷണി ഒഴിവാക്കണമെന്നാണ് ആവശ്യം.