'ഒരു ഫോണ്‍ കോൾ വന്നു; പിന്നാലെ മുറിക്കുള്ളിൽ കയറി കതകടച്ചു'; ഇന്ദുജയുടെ മരണത്തില്‍ ഭർത്താവിന്‍റെ സുഹൃത്തിനെയും കസ്റ്റഡിയിലെടുത്തു

ഇന്ദുജയുടെ മരണം ആത്മഹത്യയെന്ന് സ്ഥിരീകരിച്ച് പൊലീസ്.

തിരുവനന്തപുരം: പാലോട് ഇളവട്ടത്ത് ഭർതൃഗൃഹത്തിൽ നവവധുവിനെ മരിച്ച നിലയിൽ കണ്ടെത്തിയ സംഭവം ആത്മഹത്യയെന്ന് സ്ഥിരീകരിച്ച് പൊലീസ്. എന്നാൽ ഗാർഹിക പീഡനത്തിന്‍റെ സാധ്യതകൾ തള്ളിക്കളയാൻ ആകില്ലെന്നാണ് പൊലീസ് നിഗമനം. മരണത്തിൽ ദുരൂഹത ആരോപിച്ചു യുവതിയുടെ കുടുംബം പാലോട് പൊലീസിൽ പരാതി നൽകിയിരുന്നു.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം

അസ്വഭാവിക മരണത്തിന് കേസെടുത്ത പൊലീസ്, ഭർത്താവ് അഭിജിത്തിനെ വെള്ളിയാഴ്‌ച രാത്രി തന്നെ കസ്റ്റഡിയിൽ എടുത്തിരുന്നു. മരണദിവസം ഫോണിലേക്ക് ഒരു കോൾ വന്നതിന് പിന്നാലെയാണ് ഇന്ദുജ മുറിക്കുള്ളിൽ കയറി കതകടച്ചതെന്നാണ് ഭർതൃ ബന്ധുക്കൾ പൊലീസിൽ നൽകിയ മൊഴി. ഇവരുടെ മൊഴിയും ഫോൺ രേഖകളും പരിശോധിച്ച പൊലീസ് അഭിജിത്തിന്‍റെ ഒരു സുഹൃത്തിനെ കൂടി കസ്റ്റഡിയിൽ എടുത്തിട്ടുണ്ട്.

ഇയാളെ ചോദ്യം ചെയ്‌തു വരികയാണ്. ഇന്ദുജയുടെ ശരീരത്തിൽ കണ്ടെത്തിയ മർദനമേറ്റ പാടുകൾ എങ്ങനെ ഉണ്ടായെന്നും ഇന്ദുജ ആത്മഹത്യ ചെയ്യാനുണ്ടായ സാഹചര്യവുമാണ് പൊലീസ് പരിശോധിക്കുന്നത്. ഇരുവരും തമ്മിലുള്ള വിവാഹം രജിസ്‌റ്റര്‍ ചെയ്തിട്ടില്ല.

അഭിജിത്തിന്‍റെ വീട്ടുകാരെയും ചോദ്യം ചെയ്യാൻ സാധ്യതയുണ്ട്. മരിക്കുന്നതിന് മുമ്പ് ഇന്ദുജ ആരോടോ ഫോൺ സംസാരിച്ചിരുന്നുവെന്ന് അഭിജിത്തിന്‍റെ അമ്മുമ്മയാണ് മൊഴി നൽകിയത്. ഇതും പോലീസ് അന്വേഷിക്കുന്നുണ്ട്.

(ഓർക്കുക-ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പർ: 1056)