തിരുവനന്തപുരം: ശ്രീപത്മാനഭ സ്വാമി ക്ഷേത്രത്തിലെ ചരിത്ര പ്രസിദ്ധമായ സ്വര്‍ഗവാതില്‍ ഏകാദശി വിപുലമായ ചടങ്ങുകളോടെ നടത്തുന്നതിനുള്ള ഒരുക്കങ്ങള്‍ പൂര്‍ത്തിയായി. 2025 ജനുവരി 10ന് ആണ് സ്വര്‍ഗവാതില്‍ ഏകാദശി. 10ന് പുലര്‍ച്ചെ 2.30 മുതല്‍ 4 മണി വരെ നിര്‍മ്മാല്യ ദര്‍ശനം, അഭിഷേകം, ദീപാരാധന. തുടര്‍ന്ന് പുലര്‍ച്ചെ 4.30 മുതല്‍ 6 മണി വരെയും രാവിലെ 9.30 മുതല്‍ 12.30 മണി വരെയും വൈകിട്ട് 3.15 മുതല്‍ 6.15 വരെയും രാത്രി ശീവേലിക്ക് ശേഷവും ഭക്തര്‍ക്ക് ദര്‍ശന സൗകര്യം ഒരുക്കിയിട്ടുണ്ട്.
സ്വര്‍ഗവാതില്‍ ഏകാദശിയുടെ ഭാഗമായി രാത്രി 8.30 ഓടെ സിംഹാസന വാഹനത്തില്‍ പൊന്നും ശീവേലി ഉണ്ടായിരിക്കും. എല്ലാവര്‍ക്കും ദര്‍ശന സൗകര്യം ഒരുക്കുന്നതിന്‍റെ ഭാഗമായി അന്ന് സ്‌പെഷ്യല്‍ സേവ ടിക്കറ്റ് വഴിയുള്ള ദര്‍ശനം ഉണ്ടായിരിക്കില്ല.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
സ്വര്‍ഗവാതില്‍ ദിനത്തിലും ക്ഷേത്രത്തില്‍ നിത്യവും നടത്തുന്ന അന്നദാനത്തിന് പുറമേ സ്വര്‍ഗവാതില്‍ ഏകാദശി വ്രതം നോക്കുന്നവര്‍ക്ക് ഗോതമ്പ് കഞ്ഞി വിതരണം ഉണ്ടായിരിക്കും.
അന്ന് സുഗമമായ ദര്‍ശനം ഒരുക്കുന്നതിന്‍റെ ഭാഗമായി ക്ഷേത്രത്തില്‍ പ്രത്യേക ക്യൂ സംവിധാനം ഏര്‍പ്പെടുത്തിയിട്ടുണ്ട്. കിഴക്ക് ഭാഗത്ത് നിന്നും വടക്ക് ഭാഗത്ത് നിന്നും വരുന്ന ഭക്തര്‍ക്ക് ക്ഷേത്രത്തിന് പുറത്ത്, വടക്ക് ഭാഗത്ത് ബാരിക്കേഡ് സംവിധാനത്തിലൂടെ ക്യൂവായി പടിഞ്ഞാറേ നടവഴി അകത്ത് പ്രവേശിച്ച് തെക്ക് ഭാഗത്ത് ശ്രീകാര്യക്കാരുടെ ഓഫീസിന് മുന്നിലൂടെ ദര്‍ശനത്തിന് പ്രവേശിക്കണം.
തെക്ക് ഭാഗത്ത് നിന്നും പടിഞ്ഞാറ് ഭാഗത്ത് നിന്നും വരുന്ന ഭക്ത ജനങ്ങള്‍ ക്ഷേത്രത്തിന് പുറത്ത് പടിഞ്ഞാറേ നടയില്‍ നിന്നാരംഭിക്കുന്ന ബാരിക്കേഡിലൂടെ ക്യൂവായി തെക്കേ നടവഴി അകത്ത് പ്രവേശിച്ച് കുലശേഖര മണ്ഡപത്തെ ചുറ്റിപ്പോകുന്ന പ്രധാന ക്യൂവിലൂടെ ക്ഷേത്രത്തിനകത്തെ കിഴക്കേ നട വഴി ദര്‍ശനത്തിന് ശ്രമിക്കണമെന്ന് ശ്രീപത്മനാഭ സ്വാമി ക്ഷേത്ര അധികൃതര്‍ അറിയിച്ചു.
പത്മനാഭസ്വാമി ക്ഷേത്രത്തിലെ സ്വര്‍ഗവാതില്‍ ഏകാദശി
ധനുമാസത്തിലെ വെളുത്ത ഏകാദശിയാണ് സ്വര്‍ഗവാതില്‍ ഏകാദശിയായി കണക്കാക്കുന്നത്. ശ്രീപത്മനാഭ സ്വാമി ക്ഷേത്ര മതിലകത്ത് തെക്കു കിഴക്ക് ഭാഗത്തുള്ള ദീപയാഗ മണ്ഡപത്തില്‍ ധനു, മിഥുനം മാസങ്ങളില്‍ വര്‍ഷത്തില്‍ രണ്ട് തവണ നടത്തിവരുന്ന ആഘോഷമാണ് ഭദ്രദീപം.