കോഴിക്കോട്: ചാത്തമംഗലം എൻഐടിയിലെ സെക്യൂരിറ്റി ജീവനക്കാരും സാനിറ്റേഷൻ വിഭാഗത്തിലെ ജീവനക്കാരും സമരത്തിലേക്ക്‌. ജീവനക്കാരുടെ വിരമിക്കൽ പ്രായം നിലവിൽ 60 വയസായിരുന്നു. പുതിയ കരാർ കമ്പനി എത്തിയതോടെ വിരമിക്കൽ പ്രായം 55 ആക്കിയതിനെതിരെയാണ് സമരം.
55 വയസ് പൂർത്തിയായവർക്ക് നിർബന്ധിത വിരമിക്കലിന് കരാർ കമ്പനി നോട്ടിസ് നൽകി കഴിഞ്ഞു. പുതിയ ജീവനക്കാരെ എടുക്കുമ്പോൾ 5000 രൂപ കരാർ കമ്പനിക്ക് നൽകണമെന്നും അറിയിച്ചിട്ടുണ്ട്. സെക്യൂരിറ്റി സാനിറ്റേഷൻ വിഭാഗങ്ങളിലായി എൻഐടിയിൽ 300 ഓളം ജീവനക്കാരാണ് ജോലി ചെയ്യുന്നത്.
സാനിറ്റേഷൻ വിഭാഗത്തിൽ സ്ത്രീകളാണ് ഏറ്റവും കൂടുതൽജോലി ചെയ്യുന്നത്. മിക്കവരും വീട്ടിൽ വലിയ പ്രാരാബ്‌ധം ഉള്ളവർ. ഇവിടുന്നു കിട്ടുന്ന തുച്ഛമായ വരുമാനം കൊണ്ട്‌ മാത്രമാണ് പലരുടെയും ജീവിതം മുന്നോട്ടു കൊണ്ടു പോകുന്നത്. വിദ്യാഭ്യാസലോണും വീട് നിർമ്മാണത്തിനും ചികിത്സയ്ക്കും ലോണെടുത്തവർ നിരവധിയുണ്ട്. വിരമിക്കാൻ നോട്ടിസ് ലഭിച്ചതോടെ ഇനി എന്തുചെയ്യണമെന്നറിയാതെ പകച്ചു നിൽക്കുകയാണ് ഈ തൊഴിലാളികൾ.