തിരുവനന്തപുരം: ഓണക്കാലത്തെ ഗതാഗതക്കുരുക്ക് ഒഴിവാക്കാൻ നിർദേശങ്ങളുമായി മോട്ടോര്‍ വാഹന വകുപ്പ്. ട്രാഫിക് ബ്ലോക്കിൽ നിർബന്ധമായും ക്യൂ പാലിക്കാനും പരമാവധി പബ്ലിക് ട്രാൻസ്‌പോർട്ട് ഉപയോഗപ്പെടുത്താനും എംവിഡി നിർദേശിക്കുന്നു.
എംവിഡിയുടെ നിർദേശങ്ങൾ ഇപ്രകാരം:
- ട്രാഫിക്കില്‍ ബ്ലോക്കിൽ നിർബന്ധമായും ക്യൂ പാലിക്കുക.
- ബ്ലോക്കിൽ കിടക്കുമ്പോൾ എതിരെ വരുന്ന വാഹനങ്ങൾക്കും സൈഡ് റോഡിൽ നിന്നും റോഡ് മുറിച്ചു കടക്കാൻ ആരെങ്കിലും ഉണ്ടെങ്കിലും അവർക്കും വഴി നൽകുക. ഞാൻ ബ്ലോക്കിൽ അല്ലെ എല്ലാവരും കിടക്കട്ടെ എന്ന സങ്കുചിത ചിന്ത ഒഴിവാക്കുക.
- ബ്ലോക്കിൽ നിന്നും ഒരു വണ്ടിയെങ്കിലും ഒഴിവായാൽ തനിക്ക് കുറച്ച് മുമ്പെ പോകാൻ സാധിക്കും എന്ന യാഥാർഥ്യം മനസിലാക്കുക.
- പരമാവധി പബ്ലിക് ട്രാൻസ്‌പോർട്ട് സംവിധാനം ഉപയോഗപ്പെടുത്തുക.
- പീക്ക് ടൈമിൽ ഷോപ്പിങ് പോലുള്ള കാര്യങ്ങൾക്കുള്ള യാത്ര മാറ്റി 'ഓഫ്‌പീക്ക്' ടൈം തെരഞ്ഞെടുക്കുക.
- റോഡിൽ അനാവശ്യ പാർക്കിങ് ഒഴിവാക്കുക.
- കടയുടെ മുന്നിൽ പാർക്കിങ് സ്പേസ് ലഭ്യമല്ലെങ്കിൽ മുന്നോട്ട് പോയി റോഡിൽ നിന്നും ഇറക്കി പാർക്ക് ചെയ്‌തിട്ട് തിരികെ നടന്നുവരിക. റോഡിൽ നിർബന്ധമായും പാർക്കിങ് പാടില്ല.