തിരുവനന്തപുരം: പ്രകൃതി ദുരന്തം നേരിടുന്നതിനിടെ രാഷ്ട്രീയ പ്രസ്‌താവന നടത്തിയത് കേന്ദ്രമന്ത്രി അമിത് ഷാ മാത്രമെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ. വയനാട് ദുരന്തത്തെ കേരളം നേരിട്ടത് ഒറ്റക്കെട്ടായിട്ടാണ്. ദുരന്തമുണ്ടായ പ്രദേശങ്ങളിൽ ഓറഞ്ച് അലർട്ടായിരുന്നു ജൂലൈ 29നും പ്രഖ്യാപിച്ചത്.
പ്രദേശത്ത് ആരും പ്രതീക്ഷിക്കാത്ത രീതിയിൽ മഴ പെയ്‌തു. ഉരുൾ പൊട്ടൽ സംഭവിച്ച ശേഷമാണ് കേന്ദ്ര കാലാവസ്ഥ നിരീക്ഷണ കേന്ദ്രം റെഡ് അലർട്ട് പ്രഖ്യാപിച്ചത്. ജൂലൈ 29നും ഓറഞ്ച് അലർട്ടായിരുന്നു പറഞ്ഞിരുന്നത്. ജിയോളജിക്കൽ സർവേ ഓഫ്‌ ഇന്ത്യ 29ന് ഉച്ചയ്ക്ക് 2 മണിക്കുള്ള മുന്നറിയിപ്പിൽ ഗ്രീൻ അലർട്ടായിരുന്നു നൽകിയത്.
പ്രകൃതി ദുരന്തം പോലുള്ള കാര്യങ്ങൾ ഉണ്ടാകുന്ന ഘട്ടത്തിൽ അത് നേരിടാനാണ് മുഖ്യമന്ത്രിയുടെ ദുരിതശ്വാസ നിധി. സിഎജിയുടെ ഓഡിറ്റ്‌ ഉൾപ്പെടെയുള്ള പരിശോധന ഈ സംവിധാനത്തിനുണ്ട്. വരവിനും ചിലവിനും കൃത്യമായ കണക്കും അറിയാനുള്ള സംവിധാനമുണ്ട്. ദുരിതാശ്വാസ നിധിക്കെതിരെ വസ്‌തുത വിരുദ്ധമായ പ്രചരണം അവസാനിപ്പിക്കണം.