മുതലപ്പൊഴിയില്‍ അപകട പരമ്പര; വള്ളം മറിഞ്ഞ്‌ ഒരാള്‍ മരിച്ചു, മൂന്ന് പേര്‍ക്ക് പരിക്ക് - Muthalapozhi Accident Death

മത്സ്യ ബന്ധനത്തിനായി പോയി തിരികെ വരവേ ശക്തമായ തിരയില്‍പ്പെട്ട്‌ വള്ളം മറിഞ്ഞു.

തിരുവനന്തപുരം: മുതലപ്പൊഴിയില്‍ വള്ളം മറിഞ്ഞുണ്ടായ അപകടത്തില്‍ ഒരാള്‍ മരിച്ചു. അഞ്ചു തെങ്ങ് സ്വദേശി എബ്രഹാം ആണ് മരിച്ചത്. വള്ളം മറിഞ്ഞ് ഗുരുതരമായി പരിക്കേറ്റ എബ്രഹാമിനെ ചിറയിന്‍കീഴ് താലൂക്ക്‌ ആശുപത്രിയിലും തുടര്‍ന്ന് തിരുവനന്തപുരം മെഡിക്കല്‍ കോളജിലും എത്തിച്ചെങ്കിലും ജീവന്‍ രക്ഷിക്കാനായില്ല.

ആകെ നാല് പേരായിരുന്നു വള്ളത്തിലുണ്ടായിരുന്നത്. വള്ളം മറിഞ്ഞുണ്ടായ അപകടത്തില്‍പ്പെട്ട മറ്റ് മൂന്ന് പേരെ പരിക്കുകളോടെ ചിറയിന്‍കീഴ് താലൂക്ക് ആശുപത്രിയില്‍ പ്രവേശിപ്പിച്ചു. മത്സ്യ ബന്ധനത്തിനായി പോയി തിരികെ വരവേ ശക്തമായ തിരയില്‍പ്പെട്ടാണ് വള്ളം മറിഞ്ഞത്.

പുലിമുട്ടിലേക്ക് വള്ളം ഇടിച്ചു കയറിയായിരുന്നു രണ്ടാമത്തെ അപകടം. അപകടത്തില്‍ ഒരാള്‍ കടലില്‍ വീണു. പിന്നീട് നീന്തി കരയ്ക്ക് കയറുകയായിരുന്നു. ഈ വര്‍ഷം 11-ാമതെ അപകടമാണ് മുതലപ്പൊഴിയില്‍ ഉണ്ടാകുന്നത്. രണ്ട് പേരാണ് ഈ വര്‍ഷം ഇതു വരെ അപകടത്തില്‍ മരിച്ചത്.