ബെംഗളൂരു : ഇലക്‌ട്രോണിക് സിറ്റിയിലെ ബാംഗ്ലൂർ ബയോഇന്നോവേഷൻ സെന്‍ററിൽ (ബിബിസി) വൻ തീപിടിത്തം. 150 കോടിയിലധികം രൂപയുടെ നഷ്‌ടം സംഭവിച്ചതായി അധികൃതർ പറഞ്ഞു. അതേസമയം ആളപായമൊന്നും റിപ്പോർട്ട് ചെയ്‌തിട്ടില്ല. ഇന്ന് (ജനുവരി 15) പുലർച്ചെ 4.35ഓടെയാണ് സംഭവം.
കെട്ടിടത്തിന്‍റെ രണ്ടാം നിലയിലെ ലാബുകളിൽ നിന്നാണ് തീപിടിത്തമുണ്ടായത്. സുരക്ഷാ ജീവനക്കാരനാണ് തീപിടിത്തമുണ്ടായത് ആദ്യം കണ്ടത്. ഉടൻ തന്നെ അദ്ദേഹം അഗ്നിശമന സേനയെ വിവരമറിയിക്കുകയായിരുന്നു. തുടർന്ന് വേഗത്തിൽ തന്നെ രക്ഷാപ്രവർത്തനം ആരംഭിച്ചു. അഞ്ച് മണിക്കൂർ നീണ്ട പരിശ്രമത്തിന് ശേഷമാണ് അഗ്നിശമന സേനാംഗങ്ങൾക്ക് തീ അണയ്ക്കാൻ കഴിഞ്ഞത്.
അതേസമയം തീപിടിത്തത്തിൽ 'സ്‌റ്റാർട്ടപ്പുകൾക്ക് 80 കോടി മുതൽ 110 കോടി രൂപ വരെ നഷ്‌ടമുണ്ടായെന്നാണ് പ്രാഥമിക നിഗമനം. ബിബിസിക്ക് ഏകദേശം 42 കോടി രൂപയുടെ നഷ്‌ടം സംഭവിച്ചതായും കണക്കാക്കുന്നു. സംഭവത്തിൽ ആളപായം റിപ്പോർട്ട് ചെയ്‌തിട്ടില്ല' എന്ന് കർണാടക മന്ത്രി പ്രിയങ്ക് ഖാർഗെ പ്രസ്‌താവനയിൽ പറഞ്ഞു. കൂടുതൽ സ്‌റ്റാർട്ടപ്പുകളെ ഉൾക്കൊള്ളുന്നതിനായി അടുത്തിടെ നവീകരിച്ച രണ്ടാം നിലയിലാണ് തീപിടിത്തം ഉണ്ടായതെന്ന് മന്ത്രി വ്യക്തമാക്കി.
ഷോർട്ട് സർക്യൂട്ടാകാം തീപിടിത്തത്തിന് കാരണമെന്ന് ഉദ്യോഗസ്ഥർ പറഞ്ഞു. 'ഗലോർ ടിഎക്‌സ് സ്‌റ്റാർട്ടപ്പ് ലാബിൽ തീപിടിക്കുന്ന ലായകങ്ങളുടെ ശരിയായ രീതിയിലുള്ള മാനേജ്മെന്‍റ് ഇല്ലാത്തതിനാലാണ് അപകടം ഉണ്ടായത്. വലിയ അളവിൽ തീപിടിക്കുന്ന രാസവസ്‌തുക്കൾ അവരുടെ ലാബുകളിൽ സൂക്ഷിക്കരുതെന്നും, പകരം നിയുക്ത സംഭരണ കേന്ദ്രങ്ങളിൽ സൂക്ഷിക്കണമെന്നും സ്‌റ്റാർട്ടപ്പുകൾക്ക് നിർദേശം നൽകിയിരുന്നു' എന്ന് ഐടി, ബിടി വകുപ്പിലെ ഒരു ഉദ്യോഗസ്ഥൻ അറിയിച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
തീപിടിത്തത്തിൽ സ്ഥാപനത്തിന്‍റെ രണ്ടാം നില പൂർണമായും കത്തിനശിച്ചു. കെട്ടിടത്തിന്‍റെ നിലകളെ തമ്മിൽ പരസ്‌പരം ബന്ധിപ്പിക്കുന്ന എച്ച്‌വിഎസി ലൈനുകൾ കാരണം ഒന്നാം നിലയിലും ഗ്രൗണ്ട് ഫ്ലോറിലും വ്യാപകമായ നാശനഷ്‌ടങ്ങൾ സംഭവിച്ചു. മാത്രമല്ല ഇത് തീ പടരാൻ കാരണമായെന്നും അധികൃതർ പറഞ്ഞു.
ബാംഗ്ലൂർ ബയോ ബാങ്ക്, ക്ലീൻറൂം ഏരിയകൾ, ഫ്ലോ സൈറ്റോമെട്രി ലാബുകൾ, എച്ച്‌വിഎസി, എസി യൂണിറ്റുകൾ എന്നിവ നശിച്ചിട്ടുണ്ട്. ഫെർംബോക്‌സ്, ഫിക്‌സ് 44, ഗാലോർ ടിഎക്‌സ്, ഇമ്മ്യൂണിറ്റിസ്, യോകോഗാവ എന്നിവയുൾപ്പെടെ കേന്ദ്രത്തിനുള്ളിൽ പ്രവർത്തിക്കുന്ന നിരവധി സ്‌റ്റാർട്ടപ്പുകൾക്ക് കടുത്ത നഷ്‌ടം നേരിട്ടു. നിരവധി ഉപകരണങ്ങളും കത്തി നശിച്ചു.
അതേസമയം തീപടിത്തത്തിൽ പ്രിയങ്ക് ഖാർഗെ ദുഃഖം രേഖപ്പെടുത്തി. മാത്രമല്ല എല്ലാം പഴയ രീതിയിൽ തന്നെ കൊണ്ടുവരാൻ സർക്കാരിന്‍റെ പൂർണ പിന്തുണ ഉണ്ടാകുമെന്ന് ഉറപ്പുനൽകുകയും ചെയ്‌തു. 'വർഷങ്ങളായി നമ്മുടെ സംരംഭകരുടെ കഠിനാധ്വാനമാണ് ഇന്ന് ഈ തീപിടിത്തത്തിൽ നശിച്ചത്. അത് ഏറെ ഹൃദയഭേദകമാണ്. കെട്ടിടം വീണ്ടും പുനർനിർമിക്കാൻ സാധ്യമായ എല്ലാ സഹായങ്ങളും സർക്കാരിന്‍റെ ഭാഗത്ത് നിന്നും ഉണ്ടാകും. ഫയർ & എമർജൻസി സർവീസസ് ടീമിന്‍റെ വേഗത്തിലുള്ള പ്രവർത്തനത്തിന് നന്ദി,' എന്ന് അപകടസ്ഥലം സന്ദർശിച്ച വേളയിൽ അദ്ദേഹം പറഞ്ഞു.
ലൈഫ് സയൻസ് സ്‌റ്റാർട്ടപ്പുകളുടെ അത്യാധുനിക കേന്ദ്രമായി അറിയപ്പെടുന്ന ബാംഗ്ലൂർ ബയോഇന്നോവേഷൻ സെന്‍റർ, സംരംഭകത്വവും നവീകരണവും വളർത്തുന്നതിൽ നിർണായക പങ്ക് വഹിച്ചിട്ടുണ്ട്. അതേസമയം തീപിടിത്തത്തിന്‍റെ കാരണം അന്വേഷിച്ച് കെട്ടിടം പുനർനിർമിക്കാനുള്ള ശ്രമങ്ങൾ ഇതിനകം തന്നെ ആരംഭിച്ചിട്ടുണ്ട്.
Also Read: തിരുപ്പതി ശ്രീവെങ്കിടേശ്വര ക്ഷേത്രത്തിലെ ലഡു വിതരണ കേന്ദ്രത്തില്‍ തീപിടിത്തം, വീഡിയോ
