സംസ്ഥാനം 5600 കോടിയോളം രൂപ ചെലവഴിക്കും; എൻഎച്ച് 66 2025-ൽ പൂർത്തിയാക്കുമെന്ന് മുഹമ്മദ്‌ റിയാസ് - Muhammad Riyas About NH 66

ദേശീയ പാത 66 പൂർത്തീകരിക്കാൻ 5600 ഓളം കോടി രൂപ സംസ്ഥാനം ചിലവഴിക്കും, നിർമാണം 2025 ൽ പൂർത്തിയാകുമെന്ന്‌ പിഎ മുഹമ്മദ്‌ റിയാസ്.

തിരുവനന്തപുരം: ദേശീയ പാത 66 ന്‍റെ നിർമാണം 2025 ൽ പൂർത്തിയാക്കുമെന്ന് പൊതുമരാമത്ത് മന്ത്രി പി എ മുഹമ്മദ്‌ റിയാസ്. നാഷണൽ ഹൈവെയ്‌സ്‌ അതോറിറ്റി ഓഫ് ഇന്ത്യയുടെ പ്രതിനിധികളും സംസ്ഥാന പൊതുമരാമത്ത് വകുപ്പിലെ ഉന്നത ഉദ്യോഗസ്ഥരുമായി ഇന്ന് മന്ത്രിയുടെ അധ്യക്ഷതയിൽ ചേർന്ന യോഗത്തിന് ശേഷം മാധ്യമങ്ങളെ കാണുകയായിരുന്നു അദ്ദേഹം.

ദേശീയ പാത നിർമാണം പൂർത്തിയായാൽ വീർപ്പു മുട്ടുന്ന ഗതാഗതം സുഗമമാകുമെന്നും 2025 കഴിയുന്നതോടെ പദ്ധതി ഏറെ കുറെ പൂർത്തീകരിക്കാനാകുമെന്നും അദ്ദേഹം വ്യക്തമാക്കി. ദേശീയ പാത 66 പൂർത്തീകരിക്കാൻ 5600 ഓളം കോടി രൂപ സംസ്ഥാനം ചെലവഴിക്കും. അവസാനിക്കുന്ന റോഡ് നിർമാണ പ്രവർത്തി അപ്പപ്പോൾ പൊതു ജനത്തിന് തുറന്ന് കൊടുക്കും.

വിവിധ വകുപ്പുകളുടെ ഏകോപനം ദേശീയ പാത വികസനത്തിന് അത്യാവശ്യമാണ്. 60000 കോടിയാണ് മൊത്തം ചെലവ്. മഴക്കാലത്ത് റോഡ് ഗതാഗതവും നിർമാണ പ്രവർത്തികളും യോഗത്തിൽ ചർച്ചയായി. എല്ലാ മാസവും യോഗം ചേരും. സർവീസ് റോഡുകളിൽ കുണ്ടും കുഴിയുമുണ്ടാകുന്നുവെന്ന് വ്യാപകമായി പരാതി ലഭിച്ചു.

കരാറുകാർ വീഴ്‌ച വരുത്തുന്നതായി ശ്രദ്ധയിൽപ്പെട്ടു. സൈൻ ബോർഡുകൾ ഫലപ്രദമായി സ്ഥാപിക്കുമെന്നും ഇതിനായി സാങ്കേതിക വിദ്യയെ പരമാവധി ഉപയോഗപ്പെടുത്തുമെന്നും മുഹമ്മദ്‌ റിയാസ് പറഞ്ഞു.