കോഴിക്കോട്: കടത്തിണ്ണയില്‍ ഉറങ്ങിക്കിടന്ന യുവാവിനെ തലക്കടിച്ച്‌ ഗുരുതര പരിക്കേല്‍പിച്ച്‌ കൊലപ്പെടുത്തി. മാങ്കാവ് സ്വദേശി ഇയ്യക്കണ്ടി മുഹമ്മദ് ഷാഫി (36) ആണ് മരിച്ചത്. സംഭവത്തില്‍ തമിഴ്‌നാട് അരിയല്ലൂർ സ്വദേശി മാവട്ടം വരദരാജൻ പേട്ടയിലെ ആന്‍റണി ജോസഫിനെ (49) കോഴിക്കോട് കസബ പൊലീസ് അറസ്റ്റ്‌ ചെയ്‌തു.
ഞായറാഴ്‌ച രാത്രി ഒമ്പതരയോടെ മാങ്കാവിലാണ് നാടിനെ നടുക്കിയ സംഭവം ഉണ്ടായത്. മാങ്കാവ് അങ്ങാടിയിലെ മൃഗാശുപത്രിയുടെ സമീപത്തെ ലാബിന് മുൻവശം കിടന്നുറങ്ങിയ യുവാവിനെ ആന്‍റണി ജോസഫ് നിലത്തുവിരിക്കുന്ന ഇന്‍റർലോക്ക് കട്ടകൊണ്ട് തലക്കടിക്കുകയായിരുന്നു. ഇതിന് ശേഷം പ്രതി സ്ഥലത്തു നിന്ന് രക്ഷപ്പെട്ടു.