കോഴിക്കോട്: പാളയത്ത് നാലര കിലോ കഞ്ചാവുമായി വെള്ളയില്‍ സ്വദേശി പിടിയിൽ. നാലുകുടിപ്പറമ്പില്‍ മുഹമ്മദ് റാഫി എന്ന കുട്ടാപ്പുവാണ് (37) പിടിയിലായത്. കോഴിക്കോട് ടൗൺ പൊലീസും ഡാൻസാഫും ചേർന്ന് നടത്തിയ പരിശോധനയിലാണ് ഇയാളെ പിടികൂടിയത്. ഒഡിഷയില്‍ നിന്ന് ആറുകിലോ വരെ കഞ്ചാവ് ട്രെയിൻ മാർഗം നാട്ടിലെത്തിച്ച്‌ 12 ഗ്രാം വരുന്ന ചെറിയ പാക്കറ്റുകളാക്കി വിൽപ്പന നടത്തുന്നതാണ് ഇയാളുടെ രീതി.
നേരത്തെ കഞ്ചാവ് വിൽപ്പനയ്ക്കിടെ പിടിയിൽ ആവുകയും ശിക്ഷ അനുഭവിക്കുകയും ചെയ്‌തിട്ടുണ്ട്. രഹസ്യ വിവരത്തിന്‍റെ അടിസ്ഥാനത്തില്‍ ടൗണ്‍ പൊലീസും ഡൻസാഫും ഇയാളെ നിരീക്ഷിച്ചു വരികയായിരുന്നു. പെരുമണ്ണ കോട്ടായി താഴം വാടക വീട്ടില്‍ താമസിക്കുന്ന പ്രതി പാളയം, ബീച്ച്‌ എന്നിവിടങ്ങള്‍ കേന്ദ്രീകരിച്ചാണ് വില്‍പന നടത്തുന്നതെന്ന് പൊലീസ് അറിയിച്ചു.