തിരുവനന്തപുരം : ദുഃഖവെള്ളി ദിനത്തിൽ തിരുവനന്തപുരം ലോക്‌സഭ മണ്ഡലത്തിലെ സ്ഥാനാർഥികൾ ക്രൈസ്‌തവ ദേവാലയങ്ങൾ സന്ദർശിച്ചു. എൽഡിഎഫ് സ്ഥാനാർഥി പന്ന്യൻ രവീന്ദ്രൻ രാവിലെ 7 മണിക്ക് പാളയം സെന്‍റ് ജോസഫ്‌സ് കത്തീഡ്രലിൽ കുരിശിന്‍റെ വഴിയിൽ പങ്കെടുത്തു. ഉച്ചയ്ക്ക് 2 മണിക്ക് സ്പെൻസർ ജംഗ്ഷനിലെ പള്ളിയും അദ്ദേഹം സന്ദർശിക്കും.
യുഡിഎഫ് സ്ഥാനാർഥി ശശി തരൂരും പാളയം സെന്‍റ് ജോസഫ് കത്തീഡ്രലിൽ കുരിശിന്‍റെ വഴിയിൽ പങ്കെടുത്തു. ഉച്ചയ്ക്ക് 12.30 ന് പാളയം സിഎസ്ഐ പള്ളിയും ശശി തരൂർ സന്ദർശിച്ചു. വൈകിട്ട് 4 മണിക്ക് പള്ളിത്തുറ, വലിയ വേളി, കൊച്ചുവേളി, വെട്ടുകാട്, ചെറിയ വെട്ടുകാട്, കണ്ണാന്തുറ, തോപ്പ്, വലിയതുറ എന്നിവിടങ്ങളിലെ ക്രൈസ്‌തവ ദേവാലയങ്ങൾ ശശി തരൂർ സന്ദർശിക്കും.