'സര്‍ക്കാര്‍ സഹായത്തില്‍ നിന്ന് ഇഎംഐ പിടിക്കരുത്'; ദുരന്തബാധിരോട് ബാങ്കുകൾ അനുകമ്പ കാട്ടണമെന്ന് ഹൈക്കോടതി - HC To Banks On Gov Assistance

ദുരന്തബാധിതരിൽ നിന്നും ഇഎംഐ പിടിച്ച സംഭവത്തെ രൂക്ഷ ഭാഷയില്‍ വിമര്‍ശിച്ച് ഹൈക്കോടതി. ഇത് സംബന്ധിച്ച് സർക്കാർ ബാങ്കുകൾക്ക് നിർദേശം നൽകണമെന്ന് കോടതി.

എറണാകുളം:വയനാട് ഉരുൾപൊട്ടൽ ദുരന്ത ബാധിതരോട് ബാങ്കുകൾ അനുകമ്പ കാട്ടണമെന്ന് ഹൈക്കോടതി. ദുരന്തബാധിതർക്ക് സർക്കാർ നൽകുന്ന സഹായത്തിൽ നിന്നും ഇഎംഐയും, വായ്‌പ കുടിശികയും പിടിക്കരുത്. ഇത് സംബന്ധിച്ച് സർക്കാർ ബാങ്കുകൾക്ക് നിർദേശം നൽകണമെന്നും ഹൈക്കോടതി ഡിവിഷൻ ബഞ്ച് വാക്കാൽ വ്യക്തമാക്കി.

വയനാട് ഉരുൾപൊട്ടൽ ദുരന്തവുമായി ബന്ധപ്പെട്ട് സ്വമേധയായെടുത്ത കേസ് ഉള്‍പ്പെടെ പരിഗണിച്ചുകൊണ്ടാണ് ഹൈക്കോടതി ഇടപെടൽ. ബാങ്കുകൾ മൗലികപരമായ കടമകൾ മറക്കരുതെന്നോർമ്മിപ്പിച്ച കോടതി ദുരന്തബാധിതരിൽ നിന്നും ഇഎംഐ പിടിച്ച സംഭവത്തെ അതിരൂക്ഷമായി വിമർശിച്ചു. അനുകമ്പയും സഹാനുഭൂതിയും നഷ്‌ടപ്പെട്ടുവല്ലോയെന്ന് ചൂണ്ടിക്കാട്ടിയ കോടതി ആദ്യ ദിവസങ്ങളിൽ എല്ലാവരും കൂടെ കരയും, പിന്നീട് ഇതുപോലെ കാണിക്കുമെന്നും കുറ്റപ്പെടുത്തി.

വീണ്ടും ഇത്തരം സംഭവങ്ങൾ ഉണ്ടാകുന്നുണ്ടോയെന്ന് സർക്കാർ പരിശോധിക്കണമെന്നും കോടതി പറഞ്ഞു. ദുരന്ത ബാധിതരുടെ അക്കൗണ്ടിലേക്ക് സർക്കാർ സഹായമായി വന്ന തുകയിൽ നിന്നും ബാങ്കുകൾ ഇഎംഐ പിടിച്ചെടുത്തതിൽ വലിയ പ്രതിഷേധം ഉയരുകയും തുക തിരിച്ചു നൽകുകയും ചെയ്‌തിരുന്നു. തുടർന്ന് മുഖ്യമന്ത്രി വിളിച്ചു ചേര്‍ത്ത
ബാങ്കേഴ്‌സ് സമിതി യോഗത്തിലെ വിശദാംശങ്ങളും സർക്കാർ ഹൈക്കോടതിയെ അറിയിച്ചിട്ടുണ്ട്.

കൂടാതെ വയനാട് ഉരുൾപൊട്ടൽ ദുരന്തവുമായി ബന്ധപ്പെട്ട റിപ്പോർട്ട് അമിക്കസ് ക്യൂറിയും കോടതിയിൽ സമർപ്പിച്ചു. കേസ് ഹൈക്കോടതി ഒരാഴ്ച്ചയ്ക്ക് ശേഷം വീണ്ടും പരിഗണിക്കും.