കാസർകോട്: അവസാന ലാപ്പിലേക്ക് കടക്കുമ്പോൾ അരയും തലയും മുറുക്കി ഓടി നടന്ന് പ്രചാരണം നടത്തുകയാണ് കാസർകോട്ടെ സ്ഥാനാർഥികൾ. ശക്തമായ മത്സരം നടക്കുന്ന കാസർകോട്ട്, ഒരു വോട്ട് പോലും പാഴാകാതിരിക്കാന്‍ പഴുതടച്ചുള്ള പ്രവർത്തനങ്ങള്‍ മുന്നണികൾ ആരംഭിച്ച് കഴിഞ്ഞു. കാസർകോട് പാർലമെൻ്റ് മണ്ഡലത്തിൽ ഒൻപത് സ്ഥാനാർഥികളാണ് മത്സര രംഗത്തുള്ളത്.
എൽഡിഎഫ് സ്ഥാനാർഥി എം വി ബാലകൃഷ്‌ണൻ, യുഡിഎഫ് സ്ഥാനാർഥി രാജ്‌മോഹൻ ഉണ്ണിത്താൻ, എൻഡിഎ സ്ഥാനാർഥി എംഎൽ അശ്വിനി എന്നിവർ തമ്മിലാണ് മത്സരം നടക്കുന്നത്. കഴിഞ്ഞ തവണ ഇടതുകോട്ട പിടിച്ച രാജ്‌മോഹൻ ഉണ്ണിത്താൻ വലിയ ആത്മവിശ്വാസത്തോടെയാണ് ഇത്തവണയും പ്രചാരണ രംഗത്തുള്ളത്. എന്നാല്‍ യുഡിഎഫ് സ്ഥാനാർഥിക്ക് 2019 ലെ തെരഞ്ഞെടുപ്പ് പോലെ അത്ര എളുപ്പമാകില്ല എന്നാണ് പൊതുവെയുള്ള വിലയിരുത്തൽ.
സിപിഎം കോട്ടയായ തൃക്കരിപ്പൂരിലും പയ്യന്നൂരിലും കല്യാശ്ശേരിയിലും കഴിഞ്ഞ തവണത്തെ വോട്ട് ഇത്തവണ കണ്ടെത്താൻ കഴിഞ്ഞില്ലെങ്കിൽ ഉണ്ണിത്താന് വോട്ട് ശതമാനം കുറയും. എം പി എന്ന നിലയിൽ കാസർകോട് മണ്ഡലത്തിൽ നടപ്പാക്കിയ വികസനങ്ങൾ എണ്ണിപ്പറഞ്ഞാണ് ഉണ്ണിത്താന്‍റെ പ്രചാരണം.
രാഷ്ട്രീയത്തിന് പുറമെ ജനങ്ങളുമായി ആത്മബന്ധം ഉണ്ടാക്കാൻ ഉണ്ണിത്താന് കഴിഞ്ഞുവെന്നാണ് വിലയിരുത്തൽ. ഇത് വോട്ടാക്കി മാറ്റാൻ കഴിഞ്ഞാൽ കാസർകോട് 2019 ആവർത്തിക്കും. മണ്ഡലങ്ങളിലെ വികസന പ്രവർത്തനങ്ങളും സംസ്ഥാനത്ത് എൽഡിഎഫിനും ബിജെപിക്കും എതിരെ കോൺഗ്രസ് സ്വീകരിച്ച നിലപാടുകളും വോട്ടായി മാറുമെന്ന് യുഡിഎഫ് പ്രതീക്ഷിക്കുന്നു. എന്നാൽ കഴിഞ്ഞ തവണത്തെ സാഹചര്യമല്ല കാസർകോട് ഇത്തവണത്തേതെന്ന് എൽഡിഎഫ് പറയുന്നു.
ശബരിമലയും യൂത്ത് കോൺഗ്രസ് പ്രവർത്തകരുടെ കൊലപാതകവും 2019 ലെ തെരഞ്ഞെടുപ്പിനെ ബാധിച്ചിരുന്നു. എന്നാൽ ഇത്തവണ അത്തരമൊരു സാഹചര്യമില്ലെന്നും സിഎഎക്ക് എതിരെ ഇടതുപക്ഷം ഉയർത്തുന്ന പ്രതിഷേധം വോട്ടായി മാറുമെന്നുമാണ് പ്രതീക്ഷയെന്നും എൽഡിഎഫ് പറയുന്നു. കഴിഞ്ഞ തവണ പാർട്ടി കോട്ടകളിൽ ഉണ്ടായ വിള്ളൽ പൂർണമായും പരിഹരിച്ചിട്ടുണ്ട്. പാർട്ടി കോട്ടകളിലെ ഒരു വോട്ട് പോലും ചോരാതെ ഉള്ള പ്രവർത്തനങ്ങൾ നടത്തിവരികയാണ് ഇത്തവണ.
എൽഡിഎഫ് സ്ഥാനാർഥി എം വി ബാലകൃഷ്‌ണൻ നേരത്തേ തന്നെ പ്രചാരണം ആരംഭിച്ചിരുന്നു. പരിചിത മുഖമാണ് എന്നത് ബാലകൃഷ്‌ണന് ഗുണകരമാകും. എന്നാൽ വിജയിച്ചുകയറണമെങ്കിൽ നന്നായി തന്നെ വിയർക്കേണ്ടി വരും. വിവിധ സർവേകളിൽ ഇരുമുന്നണികൾക്കും സാധ്യത പറയുന്നുണ്ട്. അതുകൊണ്ടുതന്നെ ശക്തമായ പോരാട്ടം നടക്കുമെന്ന് ഉറപ്പാണ്.
യുഡിഎഫും എൽഡിഎഫും പൊതുയോഗങ്ങൾ സംഘടിപ്പിക്കുമ്പോൾ വീടുകളിൽ പോയി വോട്ടർമാരെ നേരിട്ട് കാണുകയെന്നതാണ് എൻഡിഎ സ്ഥാനാർഥി എം എൽ അശ്വിനിയുടെ തന്ത്രം. പരമാവധി വോട്ടർമാരെ നേരിട്ടുകണ്ട് വോട്ട് അഭ്യർത്ഥിക്കുകയാണ്‌ ഇവർ. സസ്പെൻസ് സ്ഥാനാർഥിയായാണ് അശ്വിനി കാസർകോട് എത്തിയതെങ്കിലും വളരെ പെട്ടെന്ന് തന്നെ കളം പിടിക്കുന്ന കാഴ്‌ച എതിരാളികളെ ഞെട്ടിച്ചിരുന്നു.
മഞ്ചേശ്വരം മുതൽ കല്യാശ്ശേരി വരെ ഓടിനടന്ന് പ്രചാരണം നടത്തുകയാണ് അവർ. എൻഡിഎയ്ക്ക് കാസർകോട് വിജയിക്കുക എന്നത് ബാലികേറാ മലയാണെങ്കിലും കഴിഞ്ഞ തവണത്തേക്കാളും വോട്ട് നേടാൻ കഴിഞ്ഞാൽ അശ്വിനിക്കും എൻഡിഎക്കും അഭിമാനിക്കാം. ബിജെപിയുടെ എ ക്ലാസ് മണ്ഡലങ്ങളുടെ പട്ടികയിലാണ് കാസർകോട്.
മാക്‌സിമം വോട്ട് നേടുക, നിയമസഭ തെരഞ്ഞെടുപ്പിൽ മഞ്ചേശ്വരത്ത് ജയിച്ചുകയറുക എന്നീ ലക്ഷ്യങ്ങള്‍ ബിജെപിക്ക് ഉണ്ട്. മോദി സർക്കാരിന്‍റെ വികസന നേട്ടവും കേരളത്തിന്‍റെ വികസന മുരടിപ്പും ഉയർത്തിക്കാട്ടിയാണ് അശ്വിനിയുടെ പ്രചാരണം. അവസാന ഘട്ടത്തിലേക്ക് നീങ്ങുമ്പോൾ സൈബർ യുദ്ധവും തകൃതിയായി നടക്കുന്നുണ്ട്. ഉണ്ണിത്താന് എതിരെ കുഴിമന്തി ചാലഞ്ചും യുഡിഎഫ് സൈബർ ടീമിന്‍റെ തിരിച്ചടിയും കഴിഞ്ഞ ദിവസങ്ങളിൽ സജീവ ചർച്ചയായിരുന്നു.
കാസർകോട് പാർലമെൻ്റ് മണ്ഡലത്തിലെ സ്ഥാനാർഥികളും ചിഹ്നങ്ങളും: