രാഹുൽ ഗാന്ധിയേക്കാൾ കൂടുതൽ തവണ വയനാട്ടിൽ ആന വന്നിട്ടുണ്ടെന്നാണ് ജനങ്ങൾ പറയുന്നത്; പരിഹാസവുമായി കെ സുരേന്ദ്രന്‍ - K surendran Flays Rahul Gandhi

വയനാട്ടിൽ രാഹുൽ ഗാന്ധിക്ക് ടൂറിസ്‌റ്റ് വിസയാണുള്ളതെന്നും വയനാട്ടിന് വേണ്ടി രാഹുൽ ഗാന്ധി ഒന്നും ചെയ്‌തിട്ടില്ലന്നും കെ സുരേന്ദ്രൻ. രാഹുല്‍ ഗാന്ധിക്കെതിരെ ശക്തമായ പോരാട്ടം കാഴ്‌ചവെക്കുമെന്നും കെ സുരേന്ദ്രന്‍ പറഞ്ഞു

എറണാകുളം :രാഹുല്‍ ഗാന്ധിക്കെതിരെ വിമർശനവുമായി ബിജെപി സംസ്ഥാന അധ്യക്ഷനും വയനാട് ലോക്‌സഭാ മണ്ഡലം സ്ഥാനാര്‍ഥിയുമായ കെ സുരേന്ദ്രൻ. വയനാട്ടിൽ രാഹുൽ ഗാന്ധിക്ക് ടൂറിസ്‌റ്റ് വിസയാണുള്ളതെന്നും വയനാട്ടിന് വേണ്ടി രാഹുൽ ഗാന്ധി ഒന്നും ചെയ്‌തിട്ടില്ലന്നും കെ സുരേന്ദ്രൻ വിമര്‍ശിച്ചു. കൊച്ചിയിൽ കെ എസ് രാധാകൃഷ്‌ണൻ്റെ പ്രചാരണ പരിപാടിയിൽ സംസാരിക്കുകയായിരുന്നു കെ സുരേന്ദ്രന്‍. രാഹുൽ ഗാന്ധിയേക്കാൾ കൂടുതൽ തവണ വയനാട്ടിൽ ആന വന്നിട്ടുണ്ടെന്നാണ് ജനങ്ങൾ തമാശയായി പറയുന്നതെന്നും സുരേന്ദ്രൻ പരിഹസിച്ചു.

താൻ അവിടെ ടുറിസ്‌റ്റല്ലെന്നും സ്ഥിരമായി വയനാട്ടില്‍ ഉണ്ടാകുമെന്നും അദ്ദേഹം കൂട്ടിച്ചേര്‍ത്തു. എപ്പോഴെങ്കിലും വയനാട്ടിൽ വരികയും പൊറാട്ട കഴിക്കുകയും ഇൻസ്‌റ്റയിൽ പോസ്‌റ്റിടുകയുമാണ് രാഹുൽ ചെയ്യുന്നത്. എന്തിനാണ് ഇങ്ങനെയൊരു എംപി? ആദിവാസികൾക്ക് വേണ്ടി അദ്ദേഹം എന്താണ് ചെയ്‌തത്. പ്രതിസന്ധിയെ അഭിമുഖീകരിക്കുന്ന വയനാടിന് ഒരു ടൂറിസ്‌റ്റ് എംപി എന്തിനാണന്നും കെ സുരേന്ദ്രൻ ചോദിച്ചു.

വയനാടിൻ്റെ വികസനത്തിനായി, ആസ്‌പിരേഷൻ ജില്ലയായി പ്രധാനമന്ത്രി വയനാടിനെ തെരെഞ്ഞെടുത്തെങ്കിലും ഇതുമായി ബന്ധപ്പെട്ട ഒരു യോഗത്തിൽ പോലും രാഹുൽ പങ്കെടുത്തിട്ടില്ല. ഇത്രയും നിരുത്തരവാദപരമായി പെരുമാറുന്ന ഒരു എംപി വയനാട്ടിന് ആവശ്യമുണ്ടോയെന്നാണ് ചോദിക്കാനുള്ളത്.

രാഹുല്‍ ഗാന്ധിക്കെതിരെ ശക്തമായ പോരാട്ടം കാഴ്‌ചവെക്കും. മത്സരിക്കേണ്ടതില്ലെന്ന തീരുമാനത്തിലായിരുന്നു. എന്നാല്‍ കഴിഞ്ഞ ദിവസം കേന്ദ്ര നേതൃത്വം ഡല്‍ഹിയിലേക്ക് വിളിപ്പിച്ച് രാഹുല്‍ ഗാന്ധിക്കെതിരേ മത്സരിക്കണമെന്ന് ആവശ്യപ്പെടുകയായിരുന്നു. പാര്‍ട്ടിയുടെ നിര്‍ദേശം പരിഗണിച്ച് അച്ചടക്കമുള്ള പ്രവർത്തകനെന്ന നിലയിലാണ് സ്ഥാനാര്‍ഥിത്വം ഏറ്റെടുത്തത്. രാഹുൽ വയനാട്ടിൽ വിയർക്കേണ്ടി വരും. അത് പ്രചാരണത്തിൽ തന്നെ വ്യക്തമാകുമെന്നും കെ സുരേന്ദ്രൻ പറഞ്ഞു.

രാഹുലിന് വയനാട്ടില്‍ ഈസി വാക്കോവർ ആകില്ല. കഴിഞ്ഞ തവണ അമേത്തിയിലെ ജനങ്ങൾ എന്താണോ ചെയ്‌തത് ഇത്തവണ വയനാട്ടിലെ ജനങ്ങൾ അത് ചെയ്യുമെന്ന പ്രതീക്ഷയോടെയാണ് ഞങ്ങൾ ഇറങ്ങുന്നത്. രാഹുല്‍ ഗാന്ധിയുടെ വികസന വിരുദ്ധ രാഷ്ട്രീയത്തിനെതിരെ ഉജ്ജ്വല പോരാട്ടം കാഴ്‌ചവെക്കാന്‍ അവസരം തന്ന നേതൃത്വത്തിന് നന്ദി അറിയിക്കുന്നു.
സംസ്ഥാന അധ്യക്ഷന്‍റെ ചുമതല മാറുന്നത് തീരുമാനിച്ചിട്ടില്ല. ഇതുവരെ അത്തരം ചർച്ചകൾ നടന്നിട്ടില്ല. പാർട്ടിയാണ് തീരുമാനമെടുക്കേണ്ടതെന്നും കെ. സുരേന്ദ്രൻ വ്യക്തമാക്കി.