തിരുവനന്തപുരം : രാജ്യസഭ സീറ്റില്‍ വിട്ടുവീഴ്‌ചയില്ലെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. രാജ്യസഭ സീറ്റുമായി ബന്ധപ്പെട്ട് ഇന്ന് എകെജി സെന്‍ററില്‍ നടന്ന സിപിഎം-സിപിഐ ഉഭയകക്ഷി ചര്‍ച്ചക്ക് ശേഷം മാധ്യമങ്ങളോട് പ്രതികരിക്കുന്നതിനിടെയാണ് സീറ്റില്‍ വിട്ടുവീഴ്‌ചയില്ലെന്ന് ബിനോയ് വിശ്വം വ്യക്തമാക്കിയത്. സീറ്റ് വിട്ടുകൊടുക്കുന്നത് സിപിഐക്ക് ചിന്തിക്കാന്‍ പോലുമാകില്ലെന്നും കേരള കോണ്‍ഗ്രസ് എമ്മിന്‍റെ കാര്യം തനിക്കറിയില്ലെന്നും ബിനോയ് വിശ്വം പറഞ്ഞു.
രാജ്യസഭ സീറ്റില്‍ എല്‍ഡിഎഫിലെ ആര്‍ജെഡി, കേരള കോണ്‍ഗ്രസ് എം പാര്‍ട്ടികള്‍ അവകാശമുന്നയിച്ചതിനെ തുടര്‍ന്നാണ് ഇപ്പോള്‍ പ്രതിസന്ധി ഉടലെടുത്തത്. ഇതിന് പിന്നാലെയാണ് സിപിഎം മുന്നണിയിലെ മറ്റ് പാര്‍ട്ടികളുമായി ഉഭയകക്ഷി ചര്‍ച്ച നടത്താന്‍ തീരുമാനമാകുന്നത്. ഇന്ന് എകെജി സെന്‍ററില്‍ സിപിഐയുമായിട്ടായിരുന്നു ആദ്യ റൗണ്ട് ഉഭയകക്ഷി ചര്‍ച്ച നടന്നത്.