കോഴിക്കോട്: ജീവിതത്തിലെ ഏറ്റവും വലിയ സ്വപ്‌നം നേടിയെടുത്തതിന്‍റെ സന്തോഷത്തിലാണ് ശാരിക എ കെ. സെറിബ്രല്‍ പാള്‍സി രോഗ ബാധിതയായ ശാരികയ്‌ക്ക് ശാരീരിക പരിമിതികൾ ഏറെയുണ്ട്. ഇതിനെ മറികടന്നുകൊണ്ടാണ് സിവില്‍ സര്‍വീസ് എന്ന നേട്ടം കരസ്ഥമാക്കിയത്. സിവില്‍ സര്‍വീസ് ഫലം പ്രഖ്യാപിച്ചപ്പോള്‍ 922-ാം റാങ്കാണ് കോഴിക്കോട് കീഴരിയൂർ സ്വദേശിനിയായ ശാരിക കരസ്ഥമാക്കിയത്.
തിരുവനന്തപുരത്തെ അബ്‌സല്യൂട്ട് അക്കാദമിയിലെ 'ചിത്രശലഭം' എന്ന പ്രോജക്‌ടിന് കീഴില്‍ ഓണ്‍ലൈന്‍ ആയാണ് ശാരിക പരിശീലനം നേടിയത്. രണ്ടുവര്‍ഷമായി കഠിനമായ പരിശ്രമത്തിലായിരുന്നു ഈ മിടുക്കി. ആദ്യതവണ എഴുതിയെങ്കിലും കിട്ടിയില്ല. രണ്ടാമത്തെ ശ്രമത്തില്‍ ശാരിക തന്‍റെ ലക്ഷ്യം നേടിയെടുക്കുകയായിരുന്നു.