മൂന്ന് മണിക്കൂർ, മലയാറ്റൂരിൽ കിണറ്റിൽ വീണ കാട്ടാനക്കുട്ടിയെ രക്ഷപ്പെടുത്തി വനം വകുപ്പ്

ആശങ്കകൾക്കൊടുവിൻ കുട്ടിയാന കരയ്ക്ക് കയറിയതോടെ നാട്ടുകൾ ആഹ്ലാദാരവം മുഴക്കി. കാട്ടാനകൂട്ടത്തിലേക്കാണ് കുട്ടിയാന പോയെതെന്ന് വനം വകുപ്പ് ഉദ്യോഗസ്ഥർ വ്യക്തമാക്കി.

എറണാകുളം: മലയാറ്റൂരിൽ ജനവാസ മേഖലയിലെ കിണറ്റിൽ വീണ കാട്ടാനക്കുട്ടിയെ രക്ഷപ്പെടുത്തി (baby elephant fell into well rescue operation). ജെസിബി ഉപയോഗിച്ച് കിണർ ഇടിച്ച് വഴിയുണ്ടാക്കിയാണ് കാട്ടാനക്കുട്ടിയെ കിണറ്റിൽ നിന്നും കയറ്റിയത്. കിണറ്റിൽ നിന്നും കയറിയ കാട്ടനക്കുട്ടി വനത്തിലേക്ക് ഓടിപ്പോവുകയും ചെയ്‌തു.

വനം വകുപ്പ് ഉദ്യോഗസ്ഥരുടെ നേതൃത്വത്തിലായിരുന്നു മൂന്ന് മണിക്കൂറിലധികം നീണ്ട രക്ഷാപ്രവർത്തനം നടത്തിയത്. കുട്ടിയാനയെ കരയ്‌ക്കെത്തിച്ച ശേഷം ആരോഗ്യസ്ഥിതി പരിശോധിക്കണമെന്ന് ഉദ്ദേശിച്ചിരുന്നെങ്കിലും ആന ഓടിപ്പോയതോടെ വേണ്ടെന്ന് വയ്‌ക്കുകയായിരുന്നു. ആശങ്കകൾക്കൊടുവിൻ കുട്ടിയാന കരയ്ക്ക് കയറിയതോടെ നാട്ടുകൾ ആഹ്ലാദാരവം മുഴക്കി.

കാട്ടാനകൂട്ടത്തിലേക്കാണ് കുട്ടിയാന പോയെതെന്ന് വനം വകുപ്പ് ഉദ്യോഗസ്ഥർ വ്യക്തമാക്കി. ഇന്ന് (ഫെബ്രുവരി 16) പുലർച്ചെ നാല് മണിയോടെയാണ് കൂട്ടമായി എത്തിയ കാട്ടാനക്കൂട്ടത്തിൽ നിന്നും കുട്ടിയാന കിണറ്റിൽ വീണത്. സ്വകാര്യ വ്യക്തിയുടെ റബ്ബർ തോട്ടത്തിലെ സംരക്ഷണ ഭിത്തിയില്ലാത്ത കിണറ്റിലാണ് കുട്ടിയാന വീണത്.

കൂടെയുള്ള കാട്ടാനക്കൂട്ടം മണിക്കൂറുകളോളം ഇവിടെ നിലയുറപ്പിച്ചതിനാൽ വനപാലകർക്ക് ഇവിടെ എത്താൻ കഴിഞ്ഞിരുന്നില്ല. തുടർന്ന് പടക്കം പൊട്ടിച്ച് കാട്ടാനക്കൂട്ടത്തെ തുരുത്തുകയായിരുന്നു. ആനക്കൂട്ടം ഇവിടെ നിന്നും മാറിയതോടെയാണ് കുട്ടിയാനയെ രക്ഷിക്കാനുള്ള ശ്രമം വനം വകുപ്പ് ഉദ്യോഗസ്ഥർ ആരംഭിച്ചത്.

ജെസിബി ഉപയോഗിച്ച് കിണറിൻ്റ ഒരു ഭാഗം ഇടിച്ച് വഴിയുണ്ടാക്കി കുട്ടിയാനയെ രക്ഷിക്കാൻ തീരുമാനിക്കുകയായിരുന്നു. സമാനമായ രീതിയിൽ കോതമംഗലം മാമലക്കണ്ടത്തെ ജനവാസ മേഖലയിലെ കിണറ്റിൽ കാട്ടാനയും കുട്ടിയാനയും വീണിരുന്നു. സംരക്ഷണ ഭിത്തിയില്ലാത്ത കിണറ്റിലായിരുന്നു അമ്മയാനയും കുട്ടിയാനയും വീണത്.

ആദ്യം കുട്ടിയാന കിണറ്റിൽ വീണു. രക്ഷിക്കാനുള്ള ശ്രമത്തിനിടയിൽ അമ്മയാനയും കിണറ്റിൽ വീഴുകയായിരുന്നു. അന്ന് കാട്ടാനയെയും കുട്ടിയെയും വനം വകുപ്പ് ഉദ്യോഗസ്ഥർ മണിക്കൂറുകൾ നീണ്ട ദൗത്യത്തിനൊടുവിൽ രക്ഷിച്ചിരുന്നു. ഇതേ മാത്രകയിലുള്ള രക്ഷാപ്രവർത്തനമാണ് വനം വകുപ്പ് ഉദ്യോഗസ്ഥരുടെ നേതൃത്വത്തിൽ ഇന്ന് നടത്തിയത്.

അതേസമയം, കാട്ടാന ശല്യത്തിന് പരിഹാരം കാണാൻ അധികൃതർ ഒന്നും ചെയ്യുന്നില്ലന്ന് ആരോപിച്ച് നാട്ടുകാർ പ്രതിഷേധം അറിയിച്ചു. ഫെൻസിംഗ് സ്ഥാപിക്കുന്നതിന് പണം അനുവദിച്ചെങ്കിലും തുടർ നടപടികൾ സ്വീകരിച്ചില്ലെന്നും വയനാട്ടിൽ സംഭവിച്ചത് മലയാറ്റൂരിലും സംഭവിക്കുമെന്ന മുന്നറിയിപ്പാണ് നാട്ടുകാർ അധികൃതർക്ക് നൽകുന്നത്.

കാട്ടാനയെ പേടിച്ച് രാത്രി സമയങ്ങളിൽ ഉറങ്ങാൻ കഴിയില്ലെന്നാണ് നാട്ടുകാർ പറയുന്നത്. കാട്ടാന ശല്യത്തിന് ശാശ്വതമായ പരിഹാരം കാണാനും മനുഷ്യ വന്യജീവി സംഘർഷങ്ങൾ ഒഴിവാക്കാനുള്ള ജാഗ്രത വനം വകുപ്പും സർക്കാരും സ്വീകരിക്കണമെന്നും നാട്ടുകാർ ആവശ്യപ്പെട്ടു.