ബ്രിഡ്‌ജ്‌ടൗൺ:ടി20 ലോകകപ്പ് പര്യടനത്തിന് ശേഷം ഇന്ത്യയിലേക്ക് മടങ്ങാനാകാതെ കിരീട ജേതാക്കളായ ഇന്ത്യൻ ക്രിക്കറ്റ് ടീം. ഗ്രേഡ് 3 ചുഴലിക്കാറ്റായ ബെറിൽ ചുഴലിക്കാറ്റ് മൂലം ഫ്ലൈറ്റ് റദ്ദാക്കിയതാണ് ടീം അംഗങ്ങളെ പ്രതിസന്ധിയിലാക്കിയത്. നിലവിൽ ഇന്ത്യൻ ക്യാപ്റ്റൻ രോഹിത്തും സംഘവും ബാർബഡോസിലെ ഹോട്ടലിൽ കുടുങ്ങിക്കിടക്കുകയാണെന്നാണ് ടീമിന്‍റെ അടുത്ത വൃത്തങ്ങളിൽ നിന്നും ലഭിക്കുന്ന വിവരം.
തിങ്കളാഴ്‌ച പ്രാദേശിക സമയം രാവിലെ 11 മണിക്കാണ് (8:30 PM IST) ടീം ബാർബഡോസിൽ നിന്ന് പുറപ്പെടേണ്ടിയിരുന്നത്. ബാർബഡോസിൽ നിന്ന് ന്യൂയോർക്കിലേക്കും തുടർന്ന് ദുബായിലേക്കും അവിടെ നിന്ന് ഇന്ത്യയിലേക്കും കണക്റ്റിങ് ഫ്ലൈറ്റായിരുന്നു. എന്നാൽ ചുഴലിക്കാറ്റ് കാരണം നേരത്തെ നിശ്ചയിച്ചിരുന്ന യാത്ര സാധ്യമല്ലെന്നാണ് വിവരം.