ബെംഗളൂരു :ഇന്ത്യൻ പ്രീമിയര്‍ ലീഗിന്‍റെ (ഐപിഎല്‍) പതിനേഴാം പതിപ്പില്‍ 24.75 കോടി മുടക്കി ഏറെ പ്രതീക്ഷകളോടെയാണ് കൊല്‍ക്കത്ത നൈറ്റ് റൈഡേഴ്‌സ് മിച്ചല്‍ സ്റ്റാര്‍ക്കിനെ കൂടാരത്തില്‍ എത്തിച്ചത്. എന്നാല്‍, കെകെആര്‍ പ്രതീക്ഷിച്ച പ്രകടനമല്ല സ്റ്റാര്‍ക്കിന്‍റെ ഭാഗത്ത് നിന്നുമുണ്ടായത്. ടൂര്‍ണമെന്‍റിലെ ആദ്യ രണ്ട് മത്സരങ്ങളില്‍ നിന്നും എട്ട് ഓവര്‍ പന്തെറിഞ്ഞിട്ടും വിക്കറ്റ് ഒന്നും നേടാൻ സാധിക്കാത്ത സ്റ്റാര്‍ക്കിന് 100 റണ്‍സാണ് വഴങ്ങേണ്ടി വന്നത്.
ആദ്യ മത്സരത്തില്‍ സണ്‍റൈസേഴ്‌സ് ഹൈദരാബാദിനെതിരെ 53 റണ്‍സും രണ്ടാമത്തെ കളിയില്‍ റോയല്‍ ചലഞ്ചേഴ്‌സ് ബെംഗളൂരുവിനെതിരെ 47 റണ്‍സുമായിരുന്നു സ്റ്റാര്‍ക്കിന് വിട്ടുകൊടുക്കേണ്ടി വന്നത്. നീണ്ട ഇടവേളയ്‌ക്ക് ശേഷം ഐപിഎല്‍ കളിക്കാനെത്തിയ താരം ബൗളിങ്ങില്‍ താളം കണ്ടെത്താൻ വിഷമിക്കുന്ന കാഴ്‌ചയാണ് നിലവില്‍ കാണാൻ കഴിയുന്നത്. എന്നാല്‍, ഈ സാഹചര്യത്തിലും മിച്ചല്‍ സ്റ്റാര്‍ക്ക് തന്‍റെ മികവിലേക്ക് ഉയരുമെന്ന ആത്മവിശ്വാസം പ്രകടിപ്പിച്ചിരിക്കുകയാണ് മുൻ ഇംഗ്ലണ്ട് പേസര്‍ സ്റ്റുവര്‍ട്ട് ബ്രോഡ്.
ആദ്യ രണ്ട് മത്സരവും ജയിച്ചതുകൊണ്ട് തന്നെ കൊല്‍ക്കത്ത നൈറ്റ് റൈഡേഴ്‌സ് നിരയില്‍ സ്റ്റാര്‍ക്കിന്‍റെ സ്ഥാനം സുരക്ഷിതമാണെന്നാണ് ബ്രോഡിന്‍റെ അഭിപ്രായം. സീസണിലെ ആദ്യ കളിയില്‍ സണ്‍റൈസേഴ്‌സ് ഹൈദരാബാദിനോട് നാല് വിക്കറ്റിനായിരുന്നു കൊല്‍ക്കത്തയുടെ ജയം. രണ്ടാമത്തെ കളിയില്‍ ആര്‍സിബിയെ ഏഴ് വിക്കറ്റിനായിരുന്നു അവര്‍ തകര്‍ത്തത്.