മുംബൈ:ന്യൂസിലൻഡിനെതിരായ ടെസ്റ്റ് പരമ്പര സ്വന്തം മണ്ണില്‍ ഇന്ത്യ കൈവിട്ടതിന് പിന്നാലെ പരിശീലകന്‍ ഗൗതം ഗംഭീറിന് നേരെ വിവിധ കോണുകളില്‍ നിന്നും വിമര്‍ശനം ഉയര്‍ന്നിരുന്നു. ഇപ്പോഴിതാ ഗംഭീറിന് പിന്തുണയുമായി എത്തിയിരിക്കുകയാണ് ഇന്ത്യയുടെ മുന്‍ പരിശീലകൻ രവി ശാസ്‌ത്രി.
ദേശീയ ടീമിനൊപ്പമുള്ള ഗൗതം ഗംഭീറിന്‍റെ പരിശീലനത്തിന്‍റെ പ്രാരംഭ ഘട്ടമാണ് ഇതെന്നും ഇനിയും ആവശ്യത്തിന് സമയമുണ്ടെന്നും ശാസ്‌ത്രി വിശദീകരിച്ചു. 'രണ്ട് ടെസ്റ്റ് മത്സരങ്ങളിലും ന്യൂസിലൻഡ് ഇന്ത്യയെ മനോഹരമായി തോൽപിച്ചു. ഇത് ചിന്തയ്ക്കുള്ള പ്രചോദനമാണ് (പരമ്പര തോൽവി). അദ്ദേഹം (ഗംഭീർ) ഇപ്പോൾ ജോലി ഏറ്റെടുത്തതേയുള്ളൂ.
ഇത്രയും വലിയ ഒരു ടീമിന്‍റെ പരിശീലകനാകുന്നത് ഒരിക്കലും എളുപ്പമല്ല. ഒരു പരിശീലകനെന്ന നിലയിൽ അദ്ദേഹത്തിന്‍റെ കരിയറിലെ ആദ്യ ദിവസങ്ങളാണ്. പക്ഷേ അദ്ദേഹം ഉടൻ പഠിക്കും'- പൂനെയിൽ നടന്ന രണ്ടാം ടെസ്റ്റിനിടെ രവി ശാസ്‌ത്രി പറഞ്ഞു.
ന്യൂസിലൻഡിനെതിരായ മൂന്ന് മത്സരങ്ങളുടെ പരമ്പരയിൽ ആദ്യ രണ്ട് ടെസ്റ്റുകളും തോല്‍വി വഴങ്ങിയതോടെയാണ് ഇന്ത്യയ്‌ക്ക് പരമ്പര നഷ്‌ടമായത്. 12 വർഷത്തിന് ശേഷം ഇതാദ്യമായാണ് ടീം ഇന്ത്യ നാട്ടിൽ ടെസ്റ്റ് പരമ്പര തോൽക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
അതേസമയം പൂനെയില്‍ നടന്ന രണ്ടാം ടെസ്റ്റില്‍ 113 റണ്‍സിനായിരുന്നു ആതിഥേരുടെ തോല്‍വി. ആദ്യം ബാറ്റ് ചെയ്‌ത ന്യൂസിലൻഡ് 259 റൺസ് നേടി. തുടര്‍ന്ന് ആതിഥേയരെ വെറും 156 റൺസിന് പുറത്താക്കി. ഇതോടെ അവര്‍ക്ക് ആദ്യ ഇന്നിങ്‌സില്‍ നിര്‍ണായകമായ 103 റൺസിന്‍റെ ലീഡ് നേടാൻ സാധിച്ചു. പിന്നീട് രണ്ടാം ഇന്നിങ്സിൽ 255 റൺസ് കൂട്ടിച്ചേർത്ത കിവീസ് ഇന്ത്യക്ക് 359 റൺസ് വിജയ ലക്ഷ്യം നൽകി.
ഇന്ത്യന്‍ ടീം നല്ല രീതിയിൽ തന്നെ ചേസ് ആരംഭിച്ചെങ്കിലും ബാറ്റിങ്ങിലെ തകർച്ച മത്സരം നഷ്‌ടപ്പെടുത്തുകയായിരുന്നു. ഇന്ത്യ 245 ന് പുറത്തായി. മത്സരം 113 റൺസിന് തോറ്റു. ഒപ്പം, ഒരു ടെസ്റ്റ് ബാക്കി നില്‍ക്കെ പരമ്പരയും നഷ്‌ടമായി. ആദ്യ ഇന്നിങ്സിൽ ഏഴ് വിക്കറ്റ് വീഴ്ത്തിയ സ്‌പിന്നർ മിച്ചൽ സാന്‍റ്‌നറാണ് പ്ലയർ ഓഫ് ദ മാച്ച്.
പരമ്പരയിലെ അവസാന ടെസ്റ്റ് മുംബൈയിലെ വാങ്കഡെ സ്റ്റേഡിയത്തില്‍ നടക്കും. പരമ്പര മികച്ച രീതിയിൽ അവസാനിപ്പിക്കുകയാണ് ഇന്ത്യയുടെ പ്രധാന ഉദ്ദേശം.
Also Read:പ്രത്യേക പരിഗണന ആര്‍ക്കുമില്ല, കോലിക്കും രോഹിത്തിനുമെതിരെ നിലപാട് കടുപ്പിച്ച് ഗംഭീര്‍
