ഓക്‌ലാന്‍ഡ് :ലോകകപ്പിന് മുന്‍പുള്ള അവസാന ടി20 പരമ്പരയില്‍ ന്യൂസിലന്‍ഡിനെ വെള്ളപൂശി ഓസ്‌ട്രേലിയ (New Zealand vs Australia T20I Series).ഇന്ന് നടന്ന പരമ്പരയിലെ മൂന്നാമത്തെയും അവസാനത്തെയും മത്സരത്തില്‍ 27 റണ്‍സിന്‍റെ ജയമാണ് സന്ദര്‍ശകരായ ഓസ്‌ട്രേലിയ നേടിയത്. നിരവധി പ്രാവശ്യം മഴ രസംകൊല്ലിയായി എത്തിയ മത്സരത്തില്‍ ഡക്ക്‌വര്‍ത്ത് ലൂയിസ് നിയമപ്രകാരമാണ് ഓസ്‌ട്രേലിയൻ ടീമിന്‍റെ ജയം.
പരമ്പരയില്‍ ആശ്വാസ ജയം തേടി ഈഡൻ പാര്‍ക്കിലിറങ്ങിയ ന്യൂസിലന്‍ഡ് ടോസ് നേടി ആദ്യം ഓസ്‌ട്രേലിയയെ ബാറ്റിങ്ങിനയക്കുകയായിരുന്നു. 10.4 ഓവര്‍ മാത്രമായിരുന്നു മത്സരത്തില്‍ ഓസ്‌ട്രേലിയക്ക് ബാറ്റ് ചെയ്യാൻ സാധിച്ചത്. നാല് പ്രാവശ്യമായിരുന്നു ആദ്യ ഇന്നിങ്‌സ് മഴ തടസപ്പെടുത്തിയത്.
പരമ്പരയിലെ ആദ്യ രണ്ട് മത്സരങ്ങളിലും അവസരം ലഭിക്കാതിരുന്ന സ്റ്റീവ് സ്‌മിത്ത് ഇന്ന് ഓപ്പണറായി ഓസീസ് നിരയിലേക്ക് തിരിച്ചെത്തിയിരുന്നു. എന്നാല്‍ പ്രതീക്ഷയ്‌ക്കൊത്ത നിലവാരത്തിലേക്ക് ഉയരാൻ താരത്തിനായില്ല. 3 പന്തില്‍ നാല് റണ്‍സ് നേടിയ സ്‌മിത്തിനെ ന്യൂസിലന്‍ഡ് പേസര്‍ ആദം മില്‍നെ മത്സരത്തിന്‍റെ രണ്ടാം ഓവറില്‍ പുറത്താക്കി.
മാറ്റ് ഷോര്‍ട്ടും ട്രാവിസ് ഹെഡും ചേര്‍ന്നാണ് പിന്നീട് ഓസീസ് സ്കോര്‍ ഉയര്‍ത്തിയത്. ആറ് ഓവറില്‍ 67 റണ്‍സില്‍ നില്‍ക്കെ ഷോര്‍ടിനെയും സന്ദര്‍ശകര്‍ക്ക് നഷ്‌ടപ്പെട്ടു. 11 പന്തില്‍ 27 റണ്‍സ് അടിച്ചായിരുന്നു താരം മടങ്ങിയത്.