ലണ്ടൻ:ഇംഗ്ലീഷ് പ്രീമിയര്‍ ലീഗില്‍ സീസണിലെ നാലാം തോല്‍വി ഏറ്റുവാങ്ങി മാഞ്ചസ്റ്റര്‍ യുണൈറ്റഡ്. എവേ മത്സരത്തില്‍ വെസ്റ്റ്ഹാം യുണൈറ്റഡാണ് മാഞ്ചസ്റ്ററിനെ തോല്‍പ്പിച്ചത്. മത്സരത്തിന്‍റെ രണ്ടാം പകുതിയുടെ അധിക സമയത്ത് ലഭിച്ച പെനാല്‍റ്റിയുടെ കരുത്തില്‍ 2-1 എന്ന സ്കോറിനാണ് വെസ്റ്റ്ഹാം മാഞ്ചസ്റ്റര്‍ യുണൈറ്റഡിനെ കീഴടക്കിയത്.
ക്രിസെൻസിയോ സമ്മർവില്ലെ, ജറോഡ് ബോവൻ എന്നിവരാണ് വെസ്റ്റ്ഹാം യുണൈറ്റഡിന്‍റെ ഗോള്‍ സ്കോറര്‍മാര്‍. കാസിമിറൊയുടെ വകയായിരുന്നു യുണൈറ്റഡിന്‍റെ ആശ്വാസഗോള്‍. മത്സരത്തിന്‍റെ തുടക്കത്തില്‍ കിട്ടിയ അവസരങ്ങള്‍ മുതലെടുക്കാൻ സാധിക്കാതെ പോയതാണ് മാഞ്ചസ്റ്റര്‍ യുണൈറ്റഡിന് തിരിച്ചടിയായത്.
പ്രീമിയര്‍ ലീഗ് പോയിന്‍റ് പട്ടികയില്‍ 14-ാം സ്ഥാനത്താണ് നിലവില്‍ മാഞ്ചസ്റ്റര്‍ യുണൈറ്റഡ്. 9 മത്സരങ്ങളില്‍ മൂന്ന് ജയവും രണ്ട് സമനിലയുമാണ് അവരുടെ അക്കൗണ്ടില്‍. ഈ ജയത്തോടെ വെസ്റ്റ്ഹാം 13-ാം സ്ഥാനത്തേക്ക് ഉയര്‍ന്നു. 9 മത്സരങ്ങളില്‍ നിന്നും 11 പോയിന്‍റാണ് അവര്‍ക്കും. ഗോള്‍ ശരാശരിയുടെ കരുത്തിലാണ് യുണൈറ്റഡിനേക്കാള്‍ ഒരുപടി മുന്നില്‍ വെസ്റ്റ്ഹാം സ്ഥാനം പിടിച്ചിരിക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
അതേസമയം, സീസണില്‍ വിജയവഴിയില്‍ തിരിച്ചെത്തിയിരിക്കുകയാണ് ചെല്‍സി. ലീഗ് റൗണ്ടിലെ 9-ാം മത്സരത്തില്‍ ന്യൂകാസില്‍ യുണൈറ്റഡിനെയാണ് ചെല്‍സി തകര്‍ത്തത്. ഒന്നിനെതിരെ രണ്ട് ഗോളുകള്‍ക്കായിരുന്നു ചെല്‍സിയുടെ ജയം.