ചെന്നൈ : കരിയറില്‍ 100ാം ടെസ്റ്റിന് ഇറങ്ങാനൊരുങ്ങുന്ന ഇന്ത്യന്‍ സ്‌പിന്നര്‍ ആര്‍ അശ്വിനെതിരെ കടുത്ത വിമര്‍ശനവുമായി മുന്‍ താരം ലക്ഷ്‌മണ്‍ ശിവരാമകൃഷ്‌ണന്‍ (Laxman Sivaramakrishnan). ആശംസ നേരുന്നതിനായി അശ്വിനെ (R Ashwin) പലതവണ ഫോണില്‍ വിളിച്ചുവെങ്കിലും തന്‍റെ കോള് കട്ട് ചെയ്‌തുവെന്നാണ് ലക്ഷ്‌മണ്‍ ശിവരാമകൃഷ്‌ണന്‍ ആരോപിക്കുന്നത്. പിന്നീട് മെസേജ് അയച്ചുനോക്കിയപ്പോള്‍ അതിന് മറുപടി ലഭിച്ചില്ലെന്നും സോഷ്യല്‍ മീഡിയ പ്ലാറ്റ്‌ഫോമായ എക്‌സിലാണ് ഇന്ത്യയുടെ മുന്‍ സ്‌പിന്നര്‍ പോസ്റ്റിട്ടിരിക്കുന്നത്.
അശ്വിന്‍റെ നൂറാം ടെസ്റ്റിന് ആശംസകൾ അറിയിക്കാൻ നിരവധി തവണ അദ്ദേഹത്തെ വിളിക്കാൻ ശ്രമിച്ചു. എന്‍റെ കോൾ കട്ട് ചെയ്യുകയാണുണ്ടായത്. പിന്നീട് മെസേജ് അയച്ചു. അതിനാവട്ടെ മറുപടിയും ലഭിച്ചില്ല. ഇതാണ് ഞങ്ങൾ മുൻ ക്രിക്കറ്റ് താരങ്ങൾക്ക് ലഭിക്കുന്ന ബഹുമാനം" - ലക്ഷ്‌മണ്‍ ശിവരാമകൃഷ്‌ണന്‍ എഴുതി.
ഇതിന് പിന്നാലെ അശ്വിനെ കടുത്ത ഭാഷയില്‍ തന്നെ വിമര്‍ശിച്ച് മറ്റൊരു പോസ്റ്റിട്ട അദ്ദേഹം താരത്തെക്കുറിച്ചുള്ള തന്‍റെ മുന്‍ പ്രസ്‌താവനയില്‍ ഒരു വിശദീകരണം കൂടി നല്‍കുന്നുണ്ട്. "സംസ്കാരമുള്ള ആളുകളിൽ നിന്നാണ് ബഹുമാനം ലഭിക്കുന്നത്. അശ്വിന്‍റെ ബോളിങ് ആക്ഷനിലെ ചെറിയൊരു പിഴവ് തിരുത്തുന്നതിനായി ഞാന്‍ നേരത്തെ ട്വീറ്റ്‌ ചെയ്‌തിരുന്നു. അതൊരു വിമര്‍ശനമായിരുന്നില്ല" എന്നാണ് ലക്ഷ്‌മണ്‍ ശിവരാമകൃഷ്‌ണന്‍ കുറിച്ചിരിക്കുന്നത്.
കഴിഞ്ഞ വര്‍ഷമായിരുന്നു അശ്വിനെ പരിഹസിക്കുന്ന തരത്തിലുള്ള ട്വീറ്റുമായി ലക്ഷ്‌മണ്‍ ശിവരാമകൃഷ്‌ണന്‍ രംഗത്ത് എത്തിയിരുന്നത്. പന്ത് കുത്തിത്തിരിയുന്ന ഇന്ത്യയിലെ പിച്ചുകളില്‍ ഏതൊരു വിഡ്ഢിക്കും വിക്കറ്റുകള്‍ നേടാന്‍ കഴിയും. ഫീല്‍ഡല്‍ എന്ന നിലയില്‍ അശ്വിന്‍ ടീം ഇന്ത്യയ്‌ക്ക് വലിയ ബാധ്യതയാണ്.
ഇന്ത്യന്‍ ടീമില്‍ മോശം ഫിറ്റ്‌നസുള്ള കളിക്കാരനാണ് അശ്വിനെന്നുമായിരുന്നു ശിവരാമകൃഷ്‌ണന്‍ പറഞ്ഞിരുന്നത്. എകദിന ലോകകപ്പിന് തൊട്ടുമുമ്പായിരുന്നു പ്രസ്‌തുത വിമര്‍ശനം. അന്ന് അശ്വിന്‍ തന്നെ വിളിക്കുകയും ആക്ഷനിലെ പിഴുവുകളെക്കുറിച്ച് സംസാരിച്ചിരുന്നതായും 58-കാരന്‍ പിന്നീട് പറഞ്ഞിരുന്നു.