ഹൈദരാബാദ്: ലോകത്തിലെ ഏറ്റവും പ്രശസ്‌തനായ ഫുട്ബോൾ കളിക്കാരനാണ് ക്രിസ്റ്റ്യാനോ റൊണാൾഡൊ. താരത്തിന് ലോകമെമ്പാടും ദശലക്ഷക്കണക്കിന് ആരാധകരുണ്ട്. ക്രിസ്റ്റ്യാനോയെ നേരിട്ടൊന്ന് കാണാൻ എത്രയോ ആരാധകരാണ് കൊതിക്കുന്നത്. എന്നാല്‍ ചൈനയിൽ നിന്നുള്ള ഒരു ആരാധകൻ റൊണാൾഡോയെ നേരിട്ട് കാണാൻ ഏഴു മാസം കൊണ്ട് സൈക്കിളിൽ 13,000 കിലോമീറ്ററാണ് യാത്ര ചെയ്‌തത്.
കഴിഞ്ഞ ഫെബ്രുവരിയിൽ ക്രിസ്റ്റ്യാനോയ്‌ക്ക് ചൈനാ യാത്രയുണ്ടായിരുന്നു. ഇതിനിടെ താരത്തിന് കാലിന് പരിക്കേറ്റതിനെ തുടർന്ന് അപ്രതീക്ഷിതമായി യാത്ര മുടങ്ങി. താരത്തെ കാണാൻ കൊതിച്ച ചൈനീസ് ആരാധകൻ കാങ് ഏറെ അസ്വസ്ഥനായി. തുടര്‍ന്ന് കാങ് റൊണാള്‍ഡൊയെ നേരിട്ട് കാണാൻ സൗദി അറേബ്യയിലേക്ക് പോകാൻ പദ്ധതിയിടുകയായിരുന്നു.
മാർച്ച് 18 ന് ചൈനയിൽ നിന്ന് ആരംഭിച്ച യാത്ര ഒക്ടോബർ 20 ന് ആണ് പൂര്‍ത്തിയായത്. ജോര്‍ജിയ, ഇറാൻ, ഖത്തർ തുടങ്ങി ആറു രാജ്യങ്ങളിലൂടെ സൈക്കിൾ ചവിട്ടിയാണ് റൊണാൾഡോയുടെ നിലവിലെ താവളമായ റിയാദിൽ കാങ് എത്തിയത്. ഏകദേശം 6 മാസവും 20 ദിവസവും കൊണ്ടാണ് കാങ് യാത്ര പൂർത്തിയാക്കിയത്.