ജീവിതത്തില്‍ ഒരു വ്യക്തിയ്‌ക്ക് ഏറ്റവും ആദ്യം വേണ്ടത് എന്ത് എന്ന ചോദ്യം ഉയര്‍ന്നാല്‍ ഒറ്റ ഉത്തരം മാത്രമേ പറയാൻ ഉണ്ടാകൂ, അതാണ് 'ആരോഗ്യം'. ഒരു മനുഷ്യന് ജീവിതകാലം മുഴുവൻ കൈവശം വയ്ക്കാവുന്ന വിലയേറിയ സമ്പാദ്യം കൂടിയാണ് ആരോഗ്യം. അതുകൊണ്ട് തന്നെ ചെറിയ ആരോഗ്യ പ്രശ്‌നങ്ങള്‍ക്ക് പോലും അര്‍ഹമായ പരിഗണന നാം തുടക്കത്തില്‍ തന്നെ നല്‍കിയില്ലെങ്കില്‍ പിന്നീട് അതിന് വലിയ വിലയാകും നല്‍കേണ്ടി വരിക.
ശാരീരികവും മാനസികവുമായ വളർച്ച, പ്രവര്‍ത്തന ക്ഷമത, വൈകാരിക സ്ഥിരത, സ്വയം പരിചരണത്തിനുള്ള കഴിവ്, കുടുംബത്തിൻ്റെയും സുഹൃത്തുക്കളുടെയും സഹവാസം ആസ്വദിക്കാനുള്ള കഴിവ്, പുതിയ അറിവുകള്‍ നേടിയെടുക്കുക അങ്ങനെ ജീവിതത്തിലെ പല കാര്യങ്ങള്‍ക്കും ആരോഗ്യം അത്യന്താപേക്ഷിതമാണ്. ആന്തരിക മൂല്യങ്ങള്‍ ഏറെയുള്ള ഈ കാര്യമാണ് ജീവിതത്തില്‍ ഒരു മനുഷ്യനെ വിദ്യാഭ്യാസം നേടാനും തൊഴിൽ നേടാനും വരുമാനം നേടാനും മത്സര കായികരംഗത്തോ കലാ രംഗത്തോ മികവ് പുലര്‍ത്താനും പ്രാപ്‌തമാക്കുന്നത്. നല്ല ആരോഗ്യമുണ്ടെങ്കില്‍ ഏത് രംഗത്തും നമുക്ക് നമ്മുടേതായ ഒരു വ്യക്തിമുദ്ര പതിപ്പിക്കാം. ആരോഗ്യം ഇല്ലെങ്കിലോ...?
നാം അറിഞ്ഞും അറിയാതെയും ചെയ്യുന്ന കാര്യങ്ങളാണ് പലപ്പോഴും നമ്മുടെ ആരോഗ്യത്തെ മോശമായി ബാധിക്കുന്നത്. ഇത് ഒഴിവാക്കാൻ സ്‌കൂള്‍ പഠനകാലം മുതല്‍ക്ക് തന്നെ നല്ല ആരോഗ്യ ശീലങ്ങള്‍ നാം പിന്തുടരേണ്ടതുണ്ട്. ഇതിലൂടെ, സ്വന്തം ആരോഗ്യം നോക്കാനും മറ്റുള്ളവരുടെ ആരോഗ്യം പരിപാലിക്കാനും വേണ്ട കാര്യങ്ങള്‍ കൃത്യമായി തന്നെ നമുക്ക് ചെയ്യാൻ സാധിക്കുമെന്നാണ് പബ്ലിക് ഹെൽത്ത് ഫൗണ്ടേഷൻ ഓഫ് ഇന്ത്യയുടെ (PHFI) പ്രസിഡന്‍റായ പ്രൊ. ശ്രീനാഥ് റെഡ്ഡി (Prof K. Srinath Reddy) അഭിപ്രായപ്പെടുന്നത്.
ജനങ്ങളുടെ ആരോഗ്യം മെച്ചപ്പെടുത്തുകയും സംരക്ഷിക്കുകയും ചെയ്യുന്ന ഒന്നാണ് വിദ്യാഭ്യാസം. 'വിദ്യാഭ്യാസം വികസനത്തിനും ആരോഗ്യപരമായ ഇടപെടലിനും ഒരു ഉത്തേജകമാണ്' എന്ന് യുനെസ്‌കോ (UNESCO) പോലും സ്ഥിരീകരിച്ചിട്ടുണ്ട്. സുസ്ഥിര വികസന ലക്ഷ്യം 4 (ഗുണമേന്മയുള്ള വിദ്യാഭ്യാസം) സംബന്ധിച്ച 2015 ലെ ഇഞ്ചിയോൺ പ്രഖ്യാപനവും ഇക്കാര്യത്തെ ന്യായീകരിക്കുന്നതായിരുന്നു.
നല്ല ആരോഗ്യത്തിന് പലപ്പോഴും വിദ്യാഭ്യാസം സഹായമാകാറുണ്ട്. എന്നാല്‍, മോശം ആരോഗ്യം ഒരു വിദ്യാര്‍ഥിയെ പുതിയ കാര്യങ്ങള്‍ പഠിക്കുന്നതില്‍ നിന്നും പൂര്‍ണമായോ ഭാഗികമായോ തടയുകയാണ് ചെയ്യുന്നത്. ഇത്തരം സാഹചര്യങ്ങളില്‍ വിദ്യാഭ്യാസവും ആരോഗ്യവും തമ്മിലുള്ള ബന്ധത്തെ കൂടുതല്‍ പ്രോത്സാഹിപ്പിക്കേണ്ടത് നമ്മുടെ കടമയാണ്.
വിദ്യാഭ്യാസം ഒരു കുട്ടിയില്‍ ചെലുത്തുന്ന സ്വാധീനം ചെറുതൊന്നുമല്ല. പ്രൈമറി ഘട്ടം മുതല്‍ ഹൈസ്‌കൂള്‍ കാലഘട്ടം വരെയുള്ള വര്‍ഷങ്ങളില്‍ നിരവധിയായ കാര്യങ്ങളാണ് നാം ഓരോരുത്തരും പഠിച്ചുവന്നത്. ആ കാര്യങ്ങളെല്ലാം ഭാവിയില്‍ എങ്ങനെ പ്രയോജനപ്പെട്ടു എന്നതും നമുക്ക് അറിയുന്നതാണ്. ആരോഗ്യത്തിന്‍റെ കാര്യത്തിലും ഇതാണ് നമുക്ക് വേണ്ടത്. നമ്മുടെ കുട്ടികളെ ഉത്തരവാദിത്ത ബോധമുള്ള പൗരന്മാരായി വളര്‍ത്തിയെടുക്കുന്ന സ്‌കൂളുകളില്‍ നിന്ന് വേണം ആരോഗ്യം സംരക്ഷിക്കുന്നതിന് വേണ്ട അറിവും അവര്‍ക്ക് പകര്‍ന്ന് നല്‍കാൻ.
ശുചിത്വം, വ്യക്തി ശുചിത്വം, ആരോഗ്യകരമായ ഭക്ഷണക്രമം, മതിയായ ശാരീരിക പ്രവർത്തനങ്ങൾ, ആസക്തി ഉളവാക്കുന്ന പദാർഥങ്ങൾ ഒഴിവാക്കൽ, സമൂഹത്തിലെ ഇടപഴകല്‍, സംഘർഷങ്ങൾ എങ്ങനെ പരിഹരിക്കാം എന്ന കാര്യങ്ങളിലെല്ലാം നമ്മുടെ സ്‌കൂളുകള്‍ ചെറുപ്പത്തില്‍ തന്നെ വിദ്യാര്‍ഥികള്‍ക്ക് അറിവ് നല്‍കുന്നുണ്ട്. ഇവ കൂടാതെ, റോഡ് സുരക്ഷയിലും പ്രാഥമിക ശുശ്രൂഷയിലും അറിവ് പകരുന്നതിലൂടെ ശാരീരിക ആരോഗ്യത്തെ കുറിച്ച് കുട്ടികളെ കൂടുതല്‍ ബോധവാന്മാരാക്കാൻ വിദ്യാലയങ്ങള്‍ക്ക് സാധിച്ചേക്കാം. ഇതിനൊടൊപ്പം തന്നെ, ഭീഷണിപ്പെടുത്തല്‍, ശാരീരിക അതിക്രമം, വിവേചനം, ലിംഗ പക്ഷപാതം എന്നിവയുടെ ദോഷവശങ്ങള്‍ ചര്‍ച്ച ചെയ്‌തുകൊണ്ട് കുട്ടികളിലെ നല്ല പെരുമാറ്റ രീതികളെയും രൂപപ്പെടുത്തിയെടുക്കാം.
വൃത്തിയുള്ള ചുറ്റുപാടുകൾ, നന്നായി വായുസഞ്ചാരമുള്ളതും ശരിയായ വെളിച്ചമുള്ളതുമായ ക്ലാസ് മുറികൾ, കളിസ്ഥലങ്ങൾ, വികലാംഗ സൗഹൃദ അടിസ്ഥാന സൗകര്യങ്ങൾ, ആരോഗ്യകരമായ കഫറ്റീരിയ ഭക്ഷണം, പുകയില ഉൽപന്നങ്ങൾ, മദ്യം, മയക്കുമരുന്ന് എന്നിവ ഒഴിവാക്കുന്നതിന് കർശനമായ നയങ്ങൾ നടപ്പിലാക്കുന്നതിലൂടെയും സ്‌കൂളുകൾക്ക് ആരോഗ്യ സംരക്ഷണത്തിന് വേണ്ടി സംസാരിക്കാനാകും. മാനസികാരോഗ്യ കൗൺസിലിങ് നൽകാനും യോഗ, ധ്യാന വിദ്യകൾ എന്നിവ പഠിപ്പിക്കാനും കാഴ്‌ചയുടെയും കേൾവിയുടെയും ആനുകാലിക പരിശോധനകൾ നടത്താനും നേരത്തെയുള്ള കണ്ടെത്തലും തിരുത്തലും പ്രാപ്‌തമാക്കാനും ശാരീരിക തടസങ്ങൾ നീക്കാനും അവർക്ക് കഴിയും. മാനസികാരോഗ്യ വെല്ലുവിളികളെ മറികടക്കുന്നതിനോ ശാരീരിക വൈകല്യങ്ങൾ സൃഷ്‌ടിക്കുന്ന തടസങ്ങളെ മറികടക്കുന്നതിനോ പരസ്‌പരം സഹായിക്കുന്നതിന് വിദ്യാർഥികളെ പ്രാപ്‌തരാക്കുന്നതിന് 'പിയർ ടു പിയർ' സപ്പോർട്ട് ഗ്രൂപ്പുകളും സജ്ജമാക്കാവുന്നതാണ്.
അതിലൂടെ കുട്ടികള്‍ക്കിടയില്‍ സഹാനുഭൂതി പ്രോത്സാഹിപ്പിക്കാൻ കഴിയുകയും ചെയ്യും. സ്‌കൂളുകളില്‍ പരിശീലനം ലഭിച്ച നഴ്‌സുമാരുടെ സേവനവും വളരെ അത്യാവശ്യമാണ്. ഇത്തരക്കാരുടെ സേവനം ലഭ്യമാകുന്നില്ലെങ്കില്‍ സാധാരണ ആരോഗ്യപ്രശ്‌നങ്ങളോടും ആരോഗ്യ അടിയന്തരാവസ്ഥകളോടും വൈദഗ്ധ്യത്തോടെയും സംവേദനക്ഷമതയോടും കൂടി പ്രതികരിക്കാൻ അധ്യാപകരെ പ്രാപ്‌തരാക്കുകയാണ് വേണ്ടത്.
യുവാക്കൾ ആരോഗ്യ സംബന്ധിയായ സന്ദേശങ്ങൾ ഫലപ്രദമായി ആഗിരണം ചെയ്യുകയോ പ്രയോഗിക്കുകയോ ചെയ്യുന്നില്ല, അതിന് പിന്നിലെ ന്യായവാദം മനസിലാക്കാനും അവർ തയ്യാറാകുന്നില്ല. 'എന്ത് ചെയ്യണം' എന്ന് കേൾക്കുക മാത്രമല്ല, 'എന്തുകൊണ്ട് ചെയ്യണം' എന്ന് പഠിക്കുകയും വേണ്ടത് ഏറെ ആവശ്യമാണ്. മറ്റ് മേഖലകളിലെ പ്രോഗ്രാമുകളിലെ നയങ്ങളും ആരോഗ്യത്തെ വളരെയധികം സ്വാധീനിക്കുന്നതിനാൽ, വിദ്യാർഥികൾക്ക് അവരുടെ ആരോഗ്യം സംരക്ഷിക്കുകയും ഭാവിയിൽ അത് സംരക്ഷിക്കുകയും ചെയ്യുന്ന നടപടികൾക്കായി നയരൂപീകരണക്കാരുമായി വാദിക്കാൻ കഴിയും.
ഇന്ത്യയിലെ സ്‌കൂൾ വിദ്യാർഥികൾ പുകയില നിയന്ത്രണം, വായു മലിനീകരണം കുറയ്ക്കൽ, പ്ലാസ്‌റ്റിക് ബാഗുകൾ നിർമാർജനം എന്നിവയ്ക്കായി പ്രചാരണം നടത്തി. സ്‌കൂളിലെ ഒരു അംഗവും പരിസരത്ത് പുകയില ഉപയോഗിക്കാത്ത 'പുകയില വിമുക്ത' നയങ്ങൾ സ്‌കൂളുകൾ സ്വീകരിച്ചിട്ടുണ്ടെന്ന് അവർ ഉറപ്പാക്കിയിട്ടുണ്ട്. അടുക്കളത്തോട്ടങ്ങളും ഹരിതാഭമായ ചുറ്റുപാടുകളും അവർ വികസിപ്പിച്ചെടുത്തിട്ടുണ്ട്.
ഇവയ്‌ക്കൊപ്പം തന്നെ വിദ്യാർത്ഥികൾക്ക് അവരുടെ ആരോഗ്യം സംരക്ഷിക്കുന്നതിനും പ്രോത്സാഹിപ്പിക്കുന്നതിനും ആവശ്യമായ അറിവും വൈദഗ്ധ്യവും സ്‌കൂളുകള്‍ തന്നെ നല്‍കേണ്ടതുണ്ട്. അതുവഴി അവർക്ക് ദൈനംദിന ജീവിതത്തിൽ അവർ ചെയ്യുന്ന കാര്യങ്ങൾ വിവേകപൂർവ്വം തിരഞ്ഞെടുക്കാനും അവരുടെ ആരോഗ്യത്തെയും ക്ഷേമത്തെയും ബാധിക്കുന്ന പൊതു നയങ്ങളെയും സാമൂഹിക മാനദണ്ഡങ്ങളെയും മുൻകൂട്ടി സ്വാധീനിക്കാനും കഴിയും.
ആരോഗ്യത്തെ ബാധിക്കുന്ന മറ്റൊരു ഘടകമാണ് കാലാവസ്ഥ വ്യതിയാനം. വായു, ജലം, മണ്ണ് എന്നിവയുടെ മലിനീകരണം ശാരീരികാരോഗ്യത്തെ മോശമായി തന്നെ ബാധിക്കാറുണ്ട്. ഇത് ചിലപ്പോള്‍ തങ്ങളുടെ മാനസികാരോഗ്യത്തിനും കേടുപാടുകള്‍ വരുത്തിയേക്കാം. തങ്ങളുടെ ആരോഗ്യത്തെ പ്രതികൂലമായി ബാധിക്കുന്ന ഈ ബാഹ്യ സ്വാധീനങ്ങളെ എങ്ങനെ ഒഴിവാക്കാമെന്നും ദുർബലപ്പെടുത്താമെന്നും ചെറുപ്പക്കാർ പഠിക്കണം.
ഒന്നിലധികം ഫിസിയോളജിക്കൽ സിസ്‌റ്റങ്ങളുടെ സമന്വയത്തിലൂടെ മനുഷ്യശരീരം എങ്ങനെ കാര്യക്ഷമമായി പ്രവർത്തിക്കുന്നു എന്നതിനെക്കുറിച്ചുള്ള വസ്‌തുതാപരമായി കൃത്യവും ആശയപരമായി വ്യക്തവുമായ അറിവ് സ്‌കൂളുകളാണ് നൽകേണ്ടത്. കൂടാതെ, ആ ഐക്യത്തെ തകർക്കുന്ന നിരവധി ഘടകങ്ങളെ (ആഹാരശീലങ്ങൾ മുതൽ പരിസ്ഥിതി ഭീഷണികൾ വരെ) കുറിച്ച് വിദ്യാര്‍ഥികള്‍ക്കിടയില്‍ അവബോധം വർധിപ്പിക്കുകയും വേണം. അപ്പോൾ മാത്രമേ വിദ്യാർഥികൾക്ക് അറിവുള്ള വ്യക്തിഗത തെരഞ്ഞെടുപ്പുകൾ നടത്താനും സമൂഹത്തിൽ ഫലപ്രദമായ മാറ്റങ്ങള്‍ കൊണ്ടുവരുന്ന ആളായി മാറാനും സാധിക്കൂ.
